Մեկ ամսում` հուլիսին հունիսի համեմատ` Հայաստանում թանկացել են հյութերը, հանքային ջրերն ու գարեջուրը:
Այսպես, այդ ժամանակահատվածում, ըստ Ազգային վիճակագրական ծառայության տվյալի, հանքային ջրերը թանկացել են 2-ից 9.2 տոկոսով` ըստ տարբեր տեսակների: Այդ ընթացքում հյութերի թանկացումը 4.4-ից 7.6 տոկոս է, իսկ գարեջրինը` 10.5-ից 11.2 տոկոս:
Սա կարող է պայմանավորված լինել 2 հիմնական փոփոխությամբ: Նախ, հուլիսի 1-ից այս բոլոր ըմպելիքներն ակցիզավորվում են:
Սա պետք է, որ գնային փոփոխության չհանգեցներ, քանի որ դրոշմապիտակների համար վճարված գումարը հանվում է հարկատուի վճարելիք հարկերից: Սակայն ակցիզավորումը ներմուծվել է ստվերային շրջանառության կրճատման նպատակով, և շատ հնարավոր է, որ հենց այդ կրճատումն էլ հանգեցրել է գների բարձրացման:
Հուլիսի 7-ից նաև ուժի մեջ են մտել գազի և էլեկտրաէներգիայի նոր` բարձրացված սակագները, ինչն, անկասկած, ավելացրել է այս ըմպելիքների արտադրական ծախսերը և հանգեցրել գնաճի:
Այս երկու տարբերակներն էլ հավանական են, շատ ավելի հավանական է երկուսի համադրությունը, սակայն տնտեսվարողներն ավելի հակված են երկրորդ բացատրությանը:
