Հուլիսից 7-ից հանրապետությունում բարձրացան և՛ գազի, և՛ էլեկտրաէներգիայի գները: Այս թանկացման առաջնային ազդեցությունը կոմունալ վճարների ավելացումն է: Միայն գազի 1խմ-ն թանկացել է 18 տոկոսով և 132 դրամից դարձել 156 դրամ, իսկ էլեկտրաէներգիայի 1 կՎտժ-ն 28 դրամից` 38 դրամ: Արդյունքում, հուլիսին հունիսի համեմատ բնակարանային-կոմունալ ծառայությունների սակագները բարձրացել են 12.1%-ով: Միաժամանակ, բնակարանային գազի, բնական գազով ավտոմեքենայի լիցքավորման և էլեկտրաէներգիայի վաճառքի ծառայությունները թանկացել են 14.5%-ով:
Թանկացմանը զուգահեռ, հունվար-հունիսին անցած տարվա համեմատ 7,2%-ով նվազել են Ռուսաստանից Հայաստան ներկրվող բնական գազի ծավալները և կազմել 945 մլն խմ: Միայն բնակչության սպառած գազը նույն ժամանակում նվազել է 10 տոկոսով: Սա կիսամյակային տվյալն է, այն դեպքում, երբ գազի բարձր սակագինը գործում է ընդամենը մեկ ամիս, հետևաբար գազի սպառման ծավալի նվազումը ավելի ակնհայտ կդառնա երկրորդ կիսամյակում: