Այս օրերին Ռուսաստանը ադրբեջանական կողմի հետ քննարկում է Գաբալայի ռադիոհաղորդիչ կայանում վարձակալության ժամկետը երկարաձգելու հարցը:
Տարածաշրջանային հետազոտությունների կենտրոնի ղեկավար Ռիչարդ Կիրակոսյանի գնահատմամբ` այդ քայլը կապված է մասնավորապես Իրանի հետ համագործակցությունը զարգցնելու հետ և ուղղակիորեն չի կարող ազդել հայ-ռուսական հարաբերություների վրա։
Այդուամենայնիվ, ըստ Կիրակոսյանի, սա վկայում է այն մասին, որ Ռուսաստանը և Ադրբեջանը փորձում են ավելի ակտիվացնել իրենց համագործակցությունը անվտանգության ոլորտում: Փորձագետի կարծիքով, այս զարգացումները կարող են որոշակիորեն սպառնալիք լինել Հայաստանի անվտանգության համար:
«Առաջին լրատվականի» հետ զրույցում Ռիչարդ Կիրակոսյանը նկատեց, որ ռուս-ադրբեջանական ռազմական համագործակցությունն էապես չի կարող ազդել ԼՂ հարցի կարգավորման վրա, սակայն Ռուսաստանը կարող է տարածաշրջան խաղաղապահներ ուղարկելու ցանկություն ունենալ, ինչն էլ բացասական կազդի հենց Հայաստանի վրա:
Կիրակոսյանը նկատեց, որ Հարավային Օսիայում Ռուսաստանը որոշակի լծակներ ուներ, իսկ ԼՂ-ում չունի և այժմ Ադրբեջանի հետ ռազմական համագործակցության միջոցով ցանկանում է լրացնել այդ բացը: