Գլխավոր դատախազի տեղակալ Մնացական Սարգսյանը նշեց, որ նախկինում համաներման հետ կապված ունեցել են խնդիրներ հետևյալ հարցերի կապակցությամբ, երբ «նախաքննական փուլում գտնվող բոլոր քրեական գործերով անձինք ներվեցին, այսինքն՝ նյութերով մերժվեց քրեական գործ հարուցել, և հարուցված քրեական գործերով ընկան համաներման տակ:
Մենք դատապարտված անձանց հետ ունեցանք խնդիրներ, երբ նյութական վնասի հետ կապված խնդիրներ չեն լինում, այդ իսկ պատճառով նման խնդիր ընդհանրապես չունենալու համար առաջարկում եմ, որ Քրեական դատավարության օրենքում այս վերամշակումը լինի, մինչև կընդունվի նոր Քրեական դատավարության օրենքը»:
Հարակից զեկույցով հանդես եկող պետաիրավական հանձնաժողովի անդամ, ԱԺ պատգամավոր Կորյուն Նահապետյանը նշեց, որ ներկայացված 35-րդ հոդվածի 1-ին մասի համաձայն, համաներման ակտը ընդունելու դեպքում քրեական գործի վարույթը և հետապնդումը բացառվում է, հետևաբար գործի վարույթը կարճվում է, այնինչ առաջարկվող լրացմամբ նախատեսվում է, որ երբ հանցագործությամբ պատճառված վնասը չի փոխհատուցվել, ապա քրեական գործի վարույթի և հետապնդման իրականացման բացառումը չի իրականացվում, և գործի վարույթը պետք է իրականացվի սովորական ընթացակարգով: Պետաիրավական հանձնաժողովը քննարկել է այս առաջարկը և տվել դրական եզրակացություն:
Արծվիկ Մինասյանի այն հարցին պատասխանելով, թե այս փոփոխությունը չի՞ նեղացնում համաներման ենթակա անձանց շրջանակը, Կորյուն Նահապետյանը համաձայնեց նրա հետ. «Այո, այս դեպքում շրջանակը մի քիչ ընդլայնվել է, և անգամ մինչ դատական վարույթում եթե հանցագործության պատճառած վնասը չի հատուցվել, ապա քրեական գործի վարույթի կարճում կամ հետապնդման դադարեցում չի թույլատրվում»:
