«2008-ին Հայաստանից միգրացիայի բացասական մնացորդը կազմել է շուրջ 23 հազար, 2009-ին՝ 25 հազար մարդ, 2010 թ. հասել է 29 հազար 8 հարյուրի»,- այսօր լրագրողների հետ հանդիպման ժամանակ ասաց միգրացիայի պետական ծառայության պետ Գագիկ Եգանյանը՝ հավելելով. «Չեմ կարծում, թե սա պետք է բավարար հիմք տա, որ խոսենք արտագաղթի ահագնացող տեմպերի մասին»։
«Այսինքն՝ միգրացիոն տեսանկյունից ո՛չ 2009-ին, ո՛չ էլ 2010-ին արտառոց պրոցեսներ տեղի չեն ունենում։ Որոշ հեղինակներ երևի տեղյակ չեն, թե այս երևույթը ինչպիսի ցուցանիշներով կարելի է պայմանավորել, որոշներն էլ գուցե նաև քաղաքական շահարկումների տեսանկյունից են օգտագործում արտագաղթի վերաբերյալ մեծ թվեր՝ 70 հազար և այլն։ Բայց մենք միշտ խնդրում ենք, և հիմա էլ հորդորում ենք, որ այն անձինք, ովքեր այս երևույթի վերաբերյալ հրապարակումներ պետք է անեն, բարի լինեն նաև աղբյուրը նշել, հղումներ անել»,- ասաց Գ. Եգանյանը։
Սակայն «Առաջին լրատվական»-ի այն հարցին, թե 2007 թ. համապատասխան ցուցանիշի (միգրացիայի բացասական սալդոն 2007 թ. մոտ 3 հազար 2 հարյուր է եղել) պարագայում արդյոք չի՞ կարելի ասել, որ արտագաղթի տեմպերն արագացել են վերջին տարիներին, Գ. Եգանյանը պատասխանեց. «Կարելի է ասել, որ որոշակի բարձրացում կա, որովհետև, այո, տարբերությունն զգալի է։ Բայց եթե խոսվում է արտագաղթի մտահոգիչ տեմպերի մասին, այդ թվականները պետք է վերցնել, ոչ թե 2009 և 2010 թվականները»։
