Հայ-ամերիկյան առևտրային հարաբերությունների զարգացումը Երևանում Միացյալ Նահանգների դեսպանության գլխավոր առաջնահերթություններից է: Դեսպանատունը վերջին մեկ տարվա ընթացքում Երևանում կազմակերպել է մի քանի առևտրային միջոցառում: Մասնավորապես, մարտ ամսին տեղի է ունեցել սեմինար՝ նվիրված հայ-ամերիկյան առևտրային կապերի ամրապնդմանը, մասնավորապես այն խնդրին, թե ինչպե՞ս կարող են հայ գործարարները ընդլայնել արտահանումը Միացյալ Նահանգներ՝ օգտվելով Արտոնությունների ընդհանրացված համակարգ (GSP) ծրագրից: Այս մասին այսօրվա համաժողովում հայտարարեց Հայաստանում Միացյալ Նահանգների արտակարգ և լիազոր դեսպան Ռիչարդ Միլզը:
Դեսպանը նշեց, որ մայիսին Հայաստան են եկել մի քանի ամերիկյան կազմակերպություններ՝ տեղի բիզնես-հնարավորությունները և ներդրումային միջավայրը ուսումնասիրելու համար: Մեկ ամիս առաջ՝ հոկտեմբերին, Նյու Յորքում տեղի էր ունեցել «Հայաստան ներդրումային համաժողովը», որին մասնակցում էր նաև Հայաստանի նախագահ Սերժ Սարգսյանը, մասնակցում էին աշխարհի տարբեր երկրներից ժամանած ներդրողներ, ընկերությունների ներկայացուցիչներ, պաշտոնյաներ, փորձագետներ: Դեսպան Միլզը նույնպես ներկա է եղել այդ միջոցառմանը՝ խրախուսելու օտարերկրյա ընկերությունների ներդրումները Հայաստանում:
Այսօր ամերիկյան դիվանագիտական ներկայացուցչությունը կենտրոնացել էր, մասնավորապես, Հայաստանում հանքարդյունաբերության ոլորտի զարգացման խնդրի վրա՝ Հայաստանի կառավարության հետ համատեղ կազմակերպելով «Ժամանակակից հանքարդյունաբերությունը Հայաստանում» բիզնես-համաժողովը: Ամերիկյան դեսպանատունը մտադիր է աջակցել հայկական և ամերիկյան ընկերություններին մեկտեղելու ջանքերը՝ հանքարդյունաբերությունը Հայաստանում կենսունակ դարձնելու համար:
Հանքարդյունաբերությունը, դեսպան Միլզի խոսքով, առանցքային տեղ է զբաղեցնում Հայաստանի տնտեսության մեջ և ունի մեծ ներուժ:
«Հանքարդյունաբերության ոլորտը Հայաստանի տնտեսության առաջատար ճյուղերից մեկն է, որը զգալի մասնաբաժին ունի երկրի ՀՆԱ-ում և արտահանման մեջ: Այս ոլորտն իրական հնարավորություններ ունի Հայաստանի համար, իսկ այդ հնարավորությունները սոսկ թղթի վրա ամրագրված գաղափարներ չեն. կան հանքարդյունաբերությամբ զբաղվող հաջողակ ձեռնարկություններ, որոնք արդեն գործում են և ձգտում ընդլայնել իրենց գործունեությունը: Մենք ուզում ենք, որ նրանք աճեն, զարգանան, բայց միաժամանակ պահպանվի երկրի բնական գեղեցկությունը, ներդրումներ կատարվեն այն համայնքներում, որտեղ իրականացնում են արդյունահանում, և ապահովվի աշխատուժի պաշտպանվածությունը:
Հանքարդյունահանումը կարող է հաջող ներդրում լինել և նաև մեծ շահույթ բերել Հայաստանի ժողովրդին, եթե այն կատարվի պատասխանատու ու թափանցիկ կերպով և միջազգային բնապահպանական ու սոցիալական ամենաբարձր նորմերին համահունչ: Կենսունակ հանքարդյունահանումը՝ նորագույն տեխնոլոգիաների ու սարքավորումների կիրառմամբ, անվտանգ կլինի հանքարդյունաբերության աշխատողների համար ու հնարավորություն կտա ապահովելու Հայաստանի բնության պահպանությունը»,- իր խոսքում նշեց դեսպան Ռիչարդ Միլզը:
