Երեկ Եմենի նախագահ Ալի Աբդալլահ Սալեհը հրաժարվել է ստորագրել միջնորդների ներկայացրած ներեմենյան կարգավորման ծրագիրը, համաձայն որի, որոշ ժամանակ անց նա պետք է հրաժարական տար` ստանալով անձնական անձեռնմխելիության երաշխիքներ: Սակայն այդ ծրագիրը տապալվել է, ինչի մասին նախօրեին հայտնել են Պարսից ծոցի արաբական երկրների դիվանագետները, որոնց կողմից ներկայացվել է կարգավորման ծրագիրը:
Երեկ հարձակումներ են սկսվել դիվանագետների վրա: Օտարերկրյա հինգ դիվանագետի Եմենի մայրաքաղաքում Արաբական Միացյալ Էմիրությունների դեսպանատնից հաջողվել է փրկել այն բանից հետո, երբ դեսպանատան վրա հարձակում են գործել Ալի Աբդալլահ Սալեհի կողմնակից զինվորականներն ու քաղաքացիական հագուստով մի քանի հարյուր մարդ: Դիվանագետների մեջ են եղել Պարսից ծոցի, ԱՄՆ-ի և Եվրոպայի ներկայացուցիչներ: Այս մասին հաղորդում է France Presse գործակալությունը:
Interfax-ը փոխանցում է, որ երեկ հարձակում է տեղի ունեցել Եմենում Չինաստանի դեսպանի ավտոշարասյան վրա: Հարձակվողները եղել են զինված: Ոստիկանությանը հաջողվել է հետ մղել հարձակումը: Դեսպանի վիճակի մասին տեղեկություններ չեն հաղորդվում:
ԱՄՆ վարչակազմը ափսոսանք է հայտնել Սալեհի կողմից հաշտության համաձայնագիրը ստորագրելուց հրաժարվելու փաստի առնչությամբ: Այս մասին հայտարարել է պետքարտուղար Քլինթոնը: Նա ասել է, որ Եմենի նախագահը «մեջքով է շրջվել իր պարտականություններին և անտեսել է սեփական ժողովրդի օրինական ցանկությունները»: Այս մասին հաղորդում է Associated Press գործակալությունը:
Քլինթոնը նաև ավելացրել է, թե խիստ վիրավորվել է, երբ իմացել է, որ Սալեհի կողմնակիցները շրջապատել են ԱՄԷ դեսպանատունը, որտեղ եղել են նաև ԱՄՆ դիվանագետներ:
Հիշեցնենք, որ Եմենում արդեն 3 ամսից ավելի շարունակվում են հակակառավարական ցույցերը գործող նախագահի հրաժարականի պահանջով: Հազարավոր մարդիկ զոհվել և վիրավորվել են: