ԱՄՆ նախագահ Բարաք Օբաման հիասթափված է հեռախոսազանգերի ու համացանցային լրտեսումների մասին տեղեկությունների հրապարակումից, սակայն դրա հետ մեկտեղ այդ գործունեությունը համարում է երկրի համար բացառապես օգտակար և օրինական:
«Մեր երկրի ներսում լրտեսման ծրագիր չկա: Այն, ինչ մենք ունենք, մեխանիզմներ են, որոնք թույլ են տալիս հետևել այն հեռախոսահամարին կամ էլ էլեկտրոնային փոստի հասցեին, որոնք կարող են կապ ունենալ ահաբեկչական հարձակումների հետ: Հատուկ ծառայությունների ոչ մի բացահայտում չի վկայում այն մասին, որ մենք չարաշահել ենք իշխանությունը»,- հայտարարել է Օբաման NBC հեռուստաալիքի եթերում:
Որպես օրինակ այդ ծրագրի գոյության անհրաժեշտության՝ Օբաման բերել է Բոստոնի մարաթոնի ժամանակ տեղի ունեցած ահաբեկչության հետաքննությունը:
Ամերիկացի նախագահի կարծիքով՝ հենց էլեկտրոնային լրտեսման ծրագրի օգնությամբ է հաջողվել իրավապահներին պարզել՝ արդյոք կասկածյալներ Ցարնաև եղբայրները պոտենցիալ համախոհներ ունեցե՞լ են, թե՞ ոչ, և արդյոք կապվա՞ծ են եղել ահաբեկչական խմբավորումների հետ:
Ընդ որում, Օբաման նշել է, որ կասկածում էր այդ ծրագրի արդյունավետությանը, երբ 2009թ.-ին նոր էր նախագահ դարձել, սակայն ավելի ուշ համոզվել է, որ նման ծրագրերը անհրաժեշտ են ահաբեկչության դեմ պայքարի արդյունավետության համար:
