2012թ. հոկտեմբերի սկզբին, Սուսաննա Աղաջանյանը ոստիկանության կազմակերպված հանցավորության դեմ պայքարի գլխավոր վարչությունում հայտարարություն էր տվել, որ Լոռու մարզի Վանաձորի քաղաքապետարանի ապօրինի եւ ինքնակամ շինությունների օրինականացման եւ տնօրինման բաժնի գլխավոր մասնագետ Սամվել Մնացականյանն իրենից պահանջել է կաշառք. պաշտոնյան 300 ԱՄՆ դոլար կաշառքը պահանջել էր դիմողի հանգուցյալ մոր անվամբ որպես ապօրինի կառույց հաշվառված, Վանաձոր քաղաքի Ներսիսյան փողոցում գտնվող ավտոտնակը սեփականաշնորհելու համար, իսկ Վանաձորի Նաիրի փողոցում գտնվող եւ համայնքային սեփականություն հանդիսացող շուրջ 300 քմ հողատարածքը սեփականաշնորհելու համար` 800 դոլար կաշառք:
Ոստիկանության ԿՀԴՊ գլխավոր վարչության ծառայողների ձեռնարկած միջոցառումների արդյունքում` հոկտեմբերի 3-ին Սամվել Մնացականյանը 1.100 ԱՄՆ դոլար կաշառք վերցնելու փաստով իր աշխատասենյակում բռնվել էր:
Նախապատրաստված նյութերն ուղարկվել էին ոստիկանության քննչական գլխավոր վարչություն, իսկ հիմա քրեական գործն արդեն Լոռու մարզի առաջին ատյանի դատարանում է:
Սամվել Մնացականյանին մեղադրանք է առաջադրված քր. օրի 311 պրիմ հոդվածի 3-րդ մասի 2-րդ կետով` հանրային ծառայողի կողմից խոշոր չափերով ապօրինի վարձատրություն ստանալը, որը նախատեսում է պատիժ` ազատազրկում 4-8 տարի ժամանակով:
Մեղադրական եզրակացությունից երեւում է, որ քաղաքապետարանի գլխավոր մասնագետն, այնուամենայնիվ վերցրել է կաշառքը, որը հետագայում որպես իրեղեն ապացույց կցվել է գործին: Բայց «Առաջին լրատվականին» հասած տեղեկություններով` Սամվել Մնացականյանը չի ցանկացել վերցնել գումարը. ինչ-ինչ նպատակներ հետապնդած Սուսաննա Աղաջանյանը Վանաձորի քաղաքապետարանի մոտ, մեքենայի մեջ համոզել է Ս. Մնացականյանին` վերցնել գումարը, հետն էլ` ձայնագրել: Ի վերջո, գլխավոր մասնագետը վերցրել է այն, մտել` քաղաքապետարան, որից հետո բռնվել է: Չի բացառվում, որ սա կաշառքի պրովոկացիա լինի, որն իրականում փորձել են Սամվել Մնացականյանի միջոցով ուղղել Վանաձորի քաղաքապետարանի բարձրաստիճան ղեկավարներից մեկի դեմ, ինչը սակայն ձախողվել է: Գլխավոր մասնագետը իր մեղքը վերցրել է «իր վիզը» եւ վերջակետ դրել: Սամվել Մնացականյանն այժմ «Վանաձոր» ՔԿՀ-ում է` կալանավորի կարգավիճակում:
Հ.Գ. Իմիջիայլոց, Լոռու մարզի, Վանաձոր քաղաքի ղեկավարության նախկին եւ ներկա շատ պաշտոնյաների անուններ են շրջանառվել ինչ-ինչ քրեական պատմությունների մեջ, սակայն գրեթե ոչ ոք պատասխան չի տվել: Այսինքն իրավապահները միայն միջին տրամաչափի պաշտոնյաներին են կարողանում պատասխանատվության դաշտ բերել, իսկ մեծ տրամաչափի չինովնիկներին լավագույն դեպքում` այլ գործի են տեղափոխում: Այս մարզում կրիմինալն ու իշխանական մարմինների որոշ ներկայացուցիչներ մի այլ կարգի են սերտաճած միմյանց, ուստի միանգամից առճակատման գնալը վտանգավոր է: Դուրս գալ այս կամ այն իշխանավորի դեմ, կնշանակի դուրս գալ նաեւ նրա թիկունքում կանգնած կրիմինալի դեմ: Իսկ միջին տրամաչափի չինովնիկի միջոցով պաշտոնյային «գծերից գցելը» իրավապահներին ձեռնտու է. իրենք կրիմինալի հետ գործ չեն ունենում, իսկ նրանից սպասվող հնարավոր վտանգն ուղղվում է այդ չինովնիկի դեմ:
Իսկ եթե հակամարտությունը կրիմինալ երկու խմբավորումների միջեւ է, եթե լեզու չեն գտնում, որտեղ բռնում են, այնտեղ էլ սպանում են…թեկուզ պաշտոնյա հովանավորը լինի մարզի դատախազ:
