Հայաստանում ԼեհաստանիՀանրապետության դեսպան Եժի Մարեկ Նովակովսկին հույս ունի, որ հայկական ապրանքատեսակները ավելի մեծ ծավալներով ներկայացված կլինեն լեհական շուկայում:
«2015 թվականը կարելի է առանձնացնել որպես մի ժամանակահատված, երբ հայ-լեհական տնտեսական հարաբերություններն աճ գրանցեցին: Իհարկե, այդ ցուցանիշն այնքան էլ գոհացուցիչ չէ. տարեկան ապրանքաշրջանառությունը կազմում է 60-80 հազար դոլար: Բավականին աճ գրանցվեց՝ կապված հատկապես Հայաստանից դեպի Լեհաստան արտահանման հետ: Իսկապես աճ կարելի է համարել, եթե տարեկան ցուցանիշը բարձրանա 200-250 հազարի, հետևաբար կարելի է նաև եռապատկել ապրանքաշրջանառությունը: Կան մի շարք մասնաճյուղեր, որոնք հետաքրքրված են Հայաստանում ներդրումներ կատարելով հատկապես շինարարական, բարձր տեխնոլոգիաների բնագավառներում»,- րագրողների հետ զրույցում ասաց դեսպանը:
Նրա խոսքով՝ հայ-լեհական տնտեսական հարաբերությունների զարգացումը կախված է երկու գործոններից, որոնցից մեկը հոգեբանականն է:
«Լյուբավա-Արմենիա» ռազմարդյունաբերական ձեռնարկությունն, օրինակ, ներդրում է կատարում այստեղ, համագործակցում է Պաշտպանության նախարարության հետ: Մեր գործարարները ուշադիր հետևում են այդ ձեռնարկության հաջողությանը՝ արդյոք այն շահութաբե՞ր ներդրում է: Կարելի է ասել՝ այստեղ այդ ձեռնարկությունը փորձառության օրինակ է, թե ինչպես կարելի է հաջող գործել Հայաստանի շուկայում: Երկրորդ գործոնը, թերևս, անմիջականորեն կապված է ԵՄ-Հայաստան շրջանակային պայմանագրի ստորագրման հետ: Եվրոպական հանձնաժողովը մեծ շեշտադրում է կատարում Հայաստանի մրցունակության վրա, և եթե հարցերը կարգավորվեն՝ կապված մաքսային սակագների հետ, դա բավականին կդյուրինացնի գործարարների մուտքը հայկական շուկա»,-նշեց Եժի Նովակովսկին:
Նա ընդգծեց, որ Լեհաստանը նաև հետաքրքրված է Հայաստանի հետ զբոսաշրջության ոլորտում համագործակցությամբ:
«Եթե Հայաստանը ցանկանում է դառնալ Եվրոպայի անդամ, ապա պարտադիր պետք է ուշադրություն դարձնի նաև ճանապարհային ենթակառուցվածքին»,-ասաց դեսպանը:
Նա շեշտեց, որ Հայաստանը կարիք ունի Լեհաստանում ներկայանալու որպես բրենդ:
«Դա բավականին բարդ կլինի, եթե լեհական շուկան ողողված չլինի հայկական ապրանքատեսակներով: Խնդիրն այն է, որ գնորդները տեղյակ չեն, որ նման ապրանք գոյություն ունի: Նրանք տեղյակ են դառնում հեռուստատեսության միջոցով: Հայաստանն, իհարկե հայտնի է Եվրոպայում, սակայն կոնկրետ ապրանքատեսակների հետ չի ասոցացվում»,-ասաց նա:
Դեսպանը հատուկ ընդգծել է, որ Լեհաստանի համար անակնկալ է եղել այն, որ Հայաստանը նույնպես արտադրում է սեփական դրոնները:
