Վրացական Apsny.ge կայքի փոխանցմամբ, վրաց քաղաքագետ Մամուկա Արեշիձեն անդրադարձել է Վրաստանի ներքաղաքական լարված իրավիճակին.
«Այսօր ես չեմ տեսնում, որ վրաց հասարակությունը լեցուն լինի բողոքի լիցքով: Դա մասնավորապես վերաբերում է երիտասարդությանը: Ընդդիմության բողոքի ակցիաների ժամանակ բոլոր բարերը լի են երիտասարդներով:
Ընդդիմության գլխավոր խնդիրն այն է, որ նա չի կարողանում միավորվել: Անգամ եթե «Վրացական կուսակցությունը» միանա «Ժողովրդական հավաքին», ապա համերաշխություն դա դեռ չի նշանակի: Եթե Հանրային հեռուստատեսության մոտ հավաքվածների կրքերը մարեն, ապա Օքրուաշվիլիի կամ ցանկացած մեկ ուրիշի գալն այլևս ոչինչ չի փոխի:
Ընդդիմությունը չունի իրական խարիզմատիկ առաջնորդ: Ժամանակին կար այդպիսի 3 առաջնորդ` Զվիադ Գամսախուրդիան, Գիա Չանտուրիան ու Միխեիլ Սաակաշվիլին: Այսօր վրացական ընդդիմությունը չունի այդպիսի առաջնորդներ: Հարց է առաջանում՝ ինչո՞ւ ժողովուրդը դուրս չի գալիս փողոց. որովհետև չի տեսնում այն մարդուն, որը կարող է առաջնորդել իրեն»:
Հիշեցնենք, որ մայիսի 19-ին էլ Արեշիձեն հայտարարել էր, թե մայիսի 21-ին Վրաստանում սպասելի է ամեն ինչ, քանի որ հակամարտող կողմերից ոչ մեկն էլ մտադիր չէ զիջել:
Արեշիձեի վերջին հայտարարությունը վկայում է այն մասին, որ նա հիասթափվել է վրացական ընդդիմությունից և այլևս չի հավատում, թե նրա կազմակերպած ակցիաները կարող են արդյունավետ ելք ունենալ:
