Աֆղանստանում զորախմբի կրճատումից հետո Սպիտակ տան համար ավելի դժվար կլինի վերահսկել խաղաղ ծրագրերի իրականացման ընթացքը: Այդ պատճառով էլ ԱՄՆ-ը նախատեսում է մոտ 200 միլիոն դոլար ծախսել հեռակառավարման վերահսկողության վրա, գրում է Los Angeles Times-ը:
Ծրագրերին հեռվից կհետևեն սմարթֆոնների համար նախատեսված հատուկ հավելումների, GPS տեսախցիկների և արբանյակային նկարահանումների միջոցով: Նոր տեխնոլոգիաները կօգտագործվեն Աֆղանստանի ոչ ապահով և հեռավոր շրջանները վերահսկելու համար:
Սպիտակ տունն ընդգծում է, որ չնայած զորքերի զանգվածային դուրս բերմանը՝ ԱՄՆ-ը կաջակցի Քաբուլին և կֆինանսավորի երկրի զարգացմանն ուղղված ծրագրերը: Ավելի վաղ խաղաղ ծրագրերի իրականացմանը հետևում էին զինվորականները, նրանք էին ուղեկցում տեսուչներին և ապահովում նրանց զինված պաշտպանությունը: Այժմ վերահսկողությունը կիրականացվի էլեկտրոնային սարքավորումների և տեղական պայմանագրային ծառայողների միջոցով, որոնք տեղեկատվությունը կփոխանցեն տվյալների հավաքակայան, իսկ այնուհետև՝ ԱՄՆ:
«Միջազգային օգնություն և զարգացում» հասարակական կազմակերպությունը 40 ինժեներներ է վարձել ժամանակակից տեխնոլոգիաները կարգավորելու նպատակով: Բոլոր ինժեներներին հատուկ հավելումներով սմարթֆոններ են բաժանվել: Նրանք էլ գլխավոր գրասենյակ են ուղարկում տեղում GPS տվյալներն ու խաղաղ ծրագրերի իրականացման վայրերից լուսանկարները: Նրանք պետք է հետևեն ճանապարհների, դպրոցների և արտադրամասերի կառուցման աշխատանքներին:
New York Times-ի տվյալներով՝ փետրվարին Աֆղանստանում ամերիկյան զորքի թիվը կրկնակի կկրճատվի: Այժմ այնտեղ իրենց ծառայությունն են անցկացնում 68 հազար զինծառայողներ:
