«Հայաստանի և Արցախի համար դրական կլինի, եթե Սերժ Սարգսյանն իր թիմի հետ հեռանա 2017-ի ընտրություններից հետո»,- այս մասին «Առաջին լրատվական»- ի հետ զրույցում ասաց «Հանրապետություն» կուսակցության առաջնորդ Արամ Զ. Սարգսյանը:
«Ապրիլյան պատերազմից հետո իշխանություններն արդյո՞ք հետևություններ են արել, թե ոչ, պաշտպանության նախարարը հայտարարել է ազգ- պետություն-բանակ ստեղծելու մասին՝ Իսրայելի օրինակով, արդյո՞ք այն, ինչ, որ արվում է այսօր, բավարար կլինի պատերազմի վերսկսման պարագայում: Անդրադառնալով այս հարցերին Արամ Սարգսյանը նշեց. «Վիգեն Սարգսյանը գրագետ մարդ է և շատ լավ պետք է հասկանա, որ այն, ինչ ինքն ասում է, դա գրագողություն է, և նա այդ խոսքերը գողացել է Վազգեն Սարգսյանից: Եղբայրս 99թ-ին «Միասնություն» դաշինքի հաղթանակից հետո հանրությանը մեկնաբանեց, թե ինքն ինչու է համաձայնել վարչապետի պաշտոնը ստանձնել՝ ասելով, որ բանակը առաջ էր գնացել, տնտեսությունը չէր հասցնում այդ բանակին սպասարկել, և դրա համար էլ ինքը վարչապետի պաշտոնը ստանձնել էր, որ ազգ-պետություն-բանակ դառնանք՝ դրանով լուծելով թե՛ աշխատատեղերի, թե՛ բարոյահոգեբանական խնդիրներ:
Միայն պաշտպանության նախարարի պաշտոն ունենալը բավարար չէ այդպիսի խնդիր լուծելու համար, նման կարգի խնդիրներ լուծելու համար պետք է վարչապետ լինել: Այսինքն՝ այն, ինչ-որ ասում է Վիգեն Սարգսյանը, ժողովրդական լեզվով ասած, իր «հագով» չէ: Ինքը դա շատ լավ պետք է հասկանա:
Իմ կարծիքով, այս իշխանությունները, սկսած Սերժ Սարգսյանից, վերջացրած Վիգեն Սարգսյանով, ցանկացած լավ գաղափար փչացնող են: Բանակ-պետություն դառնում է այն երկիրը, որտեղ արդար ընտրություններ են, որտեղ հանրությունը տեսնում է, որ օրենքները բոլորի համար հավասար են, որտեղ չկան արտոնյալներ:
Այս ի՞նչ օրենքներ են հորինում, ժողովրդին պարզ օրենքներ են պետք, ոչ թե չգիտեմ ինչ «խուճուճ» բոնուսային նորամուծությունները, կինդեռսյուրպրիզությունները, որ անում են էս ժողովրդի գլխին: Այս իշխանություները քայլ առ քայլ ամեն օր ժողովրդի զայրույթն իրենց հանդեպ մեծացնում են, իրենց կեղծ հայրենասիրությունը բոլորը զգում են»,- նշեց Ա. Սարգսյանը:
Մանրամասները՝ տեսանյութում: