Թուրքական Son dakika լրատվական կայքի փոխանցմամբ՝ քրդամետ «Ժողովուրդների դեմոկրատիա» կուսակցության (ԺԴԿ) դեմ տարվող հետաքննության շրջանակներում կալանքի տակ են վերցվել կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը։
Դեմիրթաշը գիշերային ժամերին ձերբակալվել էր Դիարբեքիրում գտնվող իր տանը, ապա Դիրաբեքրիրի 2-րդ վարչական դատարանի որոշմամբ Դեմիրթաշը կալանավորվել է։
Նույն դատարանի որոշմամբ կալանքի տակ է վերցվել Ֆիգեն Յուքսեքդաղը։ Ընդգծվում է, որ Դեմիրթաշից ու Յուքսեքդաղից բացի ձերբակալվել էր ևս 10 պատգամավոր՝ կապված Դեմոկրատական հասարակարգ կուսակցության (DTK), Քրդստանի համայնքների միության (KCK) և հոկտեմբերի 6-8-ի դեպքերի հետաքննության հետ։
Հաղորդվում է, որ 12 պատգամավորներին ձերբակալել էին ցուցմունք տալուց հրաժարվելու համար։ Այդ 12 պատգամավորից 5-ին կալանավորել են։ Դեմիրթաշից ու Յուքսեքդաղից բացի, կալանքի տակ են վերցվել նաև Իդրիս Բալուքենը, Լեյլա Բիրլիքը և Նուրսել Այդողանը։
Նրանցից ամենաշատ գործերը հարուցված են Սելահաթթին Դեմիրթաշի նկատմամբ. «Հանցանք գործելու նպատակով կազմակերպության հիմնում», «Ահաբեկչական կազմակերպության անդամություն», «Զինված ահաբեկչական կազմակերպության անդամություն», «Կազմակերպության անվան տակ հանցանքի գործում»։
ԺԴԿ-ական 3 պատգամավոր դատախազության հարցաքննությունից հետո ազատ են արձակվել։ Խոսքը Սըրը Սուրեյա Օնդերի, Զիյա Փիրի և Իմամ Թաշչըերի մասին է։
