Մարդու իրավունքների պաշտպանը չի կարող քննարկել վարույթներ, որոնք դատական վեճի առարկա են հանդիսանում: Ազգային ժողովում ՀՀ 2017թ. պետական բյուջեի նախագծի քննարկման ժամանակ այս մասին ասաց ՀՀ Մարդու իրավունքների պաշտպան Արման Թաթոյանը՝ պատասխանելով ԲՀԿ խմբակցության քարտուղար Միքայել Մելքումյանի հարցին: «Ասեմ ավելին՝ Մարդու իրավունքների պաշտպանը չի կարող պահանջներ ներկայացնել դատարաններին և դատավորներին: Այս մասին մենք ունենք Սահմանադրական դատարանի որոշում, սակայն սա չի նշանակում, որ մենք դատարանների հետ աշխատանք չունենք անելու»,- նշել է Թաթոյանը:
Նա մանրամասնել է, որ Մարդու իրավունքների պաշտպանը չի կարող քննարկել վարույթներ, որոնք քաղաքացիները ներկայացնում են այն ժամանակ, երբ դրանք արդեն հանդիսանում են դատական վեճի առարկա: «Սակայն մենք դատարանների հետ աշխատանքներ ունենք անելու: Օրինակ, մենք պարբերաբար իրականացնում ենք դատական նիստերի մոնիթորինգ և դրա հիման վրա ներկայացնում ենք զեկույցներ»,-ասաց Արման Թաթոյանը:
Անդրադառնալով պատգամավորի հարցին, թե Հայաստանին բիզնես օմբուդսմեն հարկավո՞ր է՝ Արման Թաթոյանը նշեց, որ ինքը մարդու իրավունքների պաշտպանի կողմից գործարարների շահերի պաշտպանության հարցերի հետ կապված քննարկումներ է ունեցել ՀՀ ներդրումների և տնտեսական զարգացման նախարարի հետ, այս պահին քննարկումներ են ընթանում մի շարք միջազգային կառույցների հետ: Նա հավելեց, որ այս պահին դեռ հայտնի չէ, թե ինչ ճանապարհով է մարդու իրավունքների պաշտպանը ներգրավվելու գործարարների շահերի պաշտպանության հարցերում, սակայն այդ հարցն իրենք քննարկում են:
Լուսանկարը՝ Photolure-ի
