Վրացական Apsny.ge կայքի փոխանցմամբ, այսօր Թբիլիսիում ու Բաթումում շարունակվել են ընդդիմության բողոքի ակցիաները: Վրաստանի խորհրդարանի նախկին խոսնակ Նինո Բուրջանաձեն ընդդիմադիր առաջնորդների հետ խորհրդատվության ժամանակ հայտարարել է, որ «Ժողովրդական հավաք» կազմակերպությունը հետևողական է լինելու:
Նա ընդգծել է, որ ընդդիմությունը մտադիր չէ ոչ մի հետքայլ կատարել, և եթե իշխանությունները ցանկանում են ցրել ընդդիմության ցույցը, ապա դա նրանց վրա շատ թանկ կնստի:
Բուրջանաձեն լրագրողներին հայտարարել է, որ Վրաստանում հեղափոխությունն արդեն սկսված է, և որ դրա մեղավորն իշխանություններն են:
Վրաց ընդդիմադիրները պահանջում են կառավարության ու նախագահ Միխեիլ Սաակաշվիլիի հրաժարականները: Վրաստանի նախկին պաշտպանության նախարար Ւրակլի Օքրուաշվիլին խոստացել է Վրաստան վերադառնալ մայիսի 25-ին: Իշխանությունները կարծում են, որ դա կարող է տեղի ունենալ Աբխազիայի միջոցով, թեև Վրաստանի ՆԳՆ-ը զգուշացրել է վրացական տարածք մտնելու դեպքում նրան ձերբակալելու մասին: Ամենայն հավանականությամբ հենց դրա համար էլ ընդդիմությունը մայիսի 25-ը հայտարարել է «ցասման օր»:
Ընդդիմադիր «Վրացական կուսակցության» առաջնորդների մի մասը միացել է «Ժողովրդական հավաք»ին: Խոսքը գնում է Լևան Գաչեչիլաձեի ու Կոկա Գունցաձեի մասին, որոնք ըննդիմության ակցիայի ժամանակ հայտարարել են, որ իրենց ուժը միասնության մեջ է:
Նրանք իրենց միացումը պայմանավորել են նրանով, որ ոստիկանությունն ուժ է կիրառել ցուցարարների նկատմամբ ու սադրանքների է դիմել (այսօր առավոտյան ողջ գիշեր Հանրային հեռուստատեսության շենքի մոտ անցկացրած ցուցարարները հարձակվել են ոստիկանական մեքենայի վրա, ինչից հետո գործին ստիպված են եղել միջամտել հատուկջոկատայինները և ռետինե փամփուշտների ու արցունքաբեր գազի միջոցով ցրել նրանց):
Վրաց փորձագետ Սոսո Ցինցաձեն հայտարարել է, որ ընդդիմությունը փորձելու է խափանել մայիսի 26-ին` Վրաստանի անկախության օրը, Թբիլիսիում կայանալիք ռազմական շքերթը, որին մասնակցելու են բոլոր զորատեսակները, ինչպես նաև ոչ թրթուրավոր ծանր տեխնիկան, հրետանին և ավիացիան:
Կան բազմաթիվ ձերբակալվածներ: