Սիրիայում զինված հակամարտությունը կարող է ավարտվել մի քանի ամսից, եթե բնակչությունն ակտիվորեն օգնի սիրիական բանակին վերականգնելու կարգուկանոնը երկրի տարածքում՝ հայտարարել է երկրի նախագահ Բաշար Ասադը: Այս մասին հայտնում է RIA Novosti-ն:
Նրա խոսքով՝ բանակն առավելապես հաջողությունների է հասնում այն շրջաններում, որտեղ նրան ակտիվորեն աջակցում են բնակիչները:
«Բոլոր այն խնդիրները, որոնց մենք բախվում ենք ներկայում, կապված են անվտանգության հարցերի հետ: Դրանք կարելի է լուծել միայն ահաբեկչությունը հաղթելով»,- հայտարարել է Ասադը:
Նա հույս է հայտնել, որ Սիրիան մինչև հաջորդ Ռամադանը կվերականգնվի: Սիրիայի նախագահը նշել է, որ բանակը անհավանական հաջողությունների է հասել մարտի դաշտում:
Ասադը հայտարարել է, որ ավելի ու ավելի շատ գրոհայիններ են հանձնվում իշխանություններին՝ վերադառնալու համար խաղաղ կյանքի, իսկ ոմանք նույնիսկ անցնում են կառավարական ուժերի կողմը:
