Ջավախքում հյուպատոսություն բացելու վերաբերյալ խոսակցությունները նորից վերսկսվել են: Մասնավորապես` երեկ, պատասխանելով ԱԺ ՀՀԿ-ական խմբակցության պատգամավոր Շիրակ Թորոսյանի հարցին, թե ինչ փուլում է գտնվում հյուպատոսության հիմնադրման հարցը` այս մասին խոսել է ՀՀ փոխարտգործնախարար Սերգեյ Մանասարյանը: Նկատենք, որ ադրբեջանական լրատվամիջոցներն արդեն արձագանքել են այս հանգամանքին և նշել, որ եթե Ջավախքում հյուպատոսություն բացվի, իրենք էլ կպահանջեն վրացական իշխանություններից ադրբեջանական հյուպատոսություն բացել Բորչալուում:
«Միտք» վերլուծական կենտրոնի ղեկավար, ջավախահայ Վահե Սարգսյանը «Առաջին լրատվականի» հետ զրույցում նշեց, որ Ադրբեջանի նման արձագանքը նորություն չէ, քանզի Ադրբեջանը դեռևս 90-ականներից հանդես է եկել նման առաջարկներով, ինչն էլ հայկական հայտարարություններին հակակշռելու նպատակով է արվում, քանզի ժամանակային առումով համընկնում են:
Սարգսյանը հիշեցրեց, որ Ջավախքում հյուպատոսարանի բացման վերաբերյալ հայտարարություններ եղել են դեռևս 2002թ., այնուհետև սառեցվել էին,ևայդ մասին խոսվում է միայն այսօր: Ըստ Սարգսյանի` այդ հայտարարություններն իրականացնելը բարդ է` հաշվի առնելով Ջավախքում Վրաստանի իրականացրած հակահայ քաղաքականությունը. «Իհարկե, նման հայտարարությունը ուրախալի փաստ է, սակայն, տեսնելով վերջին շրջանում Ջավախքում իրականացվող Վրաստանի հակահայկական գործողությունները` մշակութային մեկուսացում, հայոց լեզվի ճնշում, կրոնական խտրական դրսևորումներ, չեմ կարծում, որ վրացական իշխանությունները հեշտությամբ կհամաձայնեն հյուպատոսարանի բացմանը, քանզի բացի իրավական դաշտի ստեղծումից, հոգեբանական մեծ ազդեցություն կունենա եռագույնի բարձրացումը Ջավախքում»: