Ամերիկյան Associated Press լրատվական գործակալության փոխանցմամբ՝ ԱՄՆ ռազմաօդային ուժերի ներկայացուցիչ, գնդապետ Ջոն Դորիանը հայտարարել է, որ իրաքյան ուժերը դադար են հայտարարել Մոսուլի հարձակողական գործողության ժամանակ։
Դորիանն ընդգծել է, որ դադարի պատճառը ազատագրված տարածքներում ԴԱԻՇ-ի զինյալների բացակայության մեջ համոզվելն է։ Նրա խոսքերով՝ Իրաքի զինվորականներն իրականացնում են վերաբաշխում, վերակոմպլեկտավորում ու թիկունքում գտնվող դիրքերի հավելյալ մաքրում։
Դորիանը հավելել է, որ դադարը տևելու է միայն մի քանի օր, ինչից հետո իրաքցի զինվորականները կշարունակեն հարձակումը Մոսուլի ուղղությամբ։ Դորիանը նորմալ է համարել տվյալ փուլում վերցված դադարը, որը ոչ մի կերպ չի նշանակում, թե իրաքցի զինվորականները ժամանակ են կորցնում։
Իրաքցի զինվորականները Մոսուլի ազատագրման գործողությունը սկսել են հոկտեմբերի 17-ին։
