«Առաջին լրատվական»- ի զրուցակիցն է ԱԱԾ պետի նախկին տեղակալ Գուրգեն Եղիազարյանը:
-Պարոն Եղիազարյան, դեռևս հուլիս ամսին ՊՊԾ գնդի շուրջ ստեղծված իրավիճակի հանգուցալուծումից հետո օգոստոսի 4-ին հեռացվեց ԱԱԾ պետի տեղակալ Հրանտ Եպիսկոպոսյանը: Ըստ մամուլում շրջանառվող տեղեկությունների՝ նա պատրաստվում է մեկնել ԱՄՆ: Ինչպե՞ս եք գնահատում այս հանգամանքը, ինչպե՞ս կարող է նման պաշտոն զբաղեցրած անձը լքել Հայաստանի տարածքը:
-Իմ գնահատմամբ՝ շատ վատ է, որ նման գաղտնիքների տիրապետող անձը պետք է գնա մեկ այլ երկիր: Հայտնի է, որ նա Ազգային անվտանգությունում օպերատիվ ծառայություններն է ղեկավարել, ավելին չեմ կարող ասել: Գորիկ Հակոբյանի հետ, երբ որ նա ղեկավար դիրքում էր, ծիծաղելի բաներ կատարվեցին ԱԱԾ-ում. կա՛մ այդ կառույցը ուրիշ խնդիրներ էր լուծում, կա՛մ եթե դիտավորություն չկար, ապա ինչու, օրինակ, նույն Նորք-Մարաշում հայտնաբերված զինված խմբի հետ կապված անհասկանալի շատ դրվագներ կային, ըստ ԱԱԾ հաղորդագրության այդ խումբը ավելի քան 7 ամիս իրենց տեսադաշտում է եղել: Ինչպե՞ս կարող էր լինել իրենց տեսադաշտում և զենքեր հավաքեր՝ ինքնաձիգներ, նռնակ, քարտեզներ՝ չգիտես ինչու. քարտեզ էր պետք, որ նրանք կողմնորոշվեն, թե Բաղրամյան 26-ը որտեղ է գտնվո՞ւմ. այսինքն՝ մենք գործ ունենք խեղկատակների հետ: Մյուս կողմից էլ կարելի է մտածել, որ դիտավորյալ էին թույլ տալիս, որ այդ խումբը գործի, թե ինչ նպատակներով, սա այլ խնդիր է: Կարճ կարող եմ ասել, որ առջևում սահմանադրական հանրաքվեն էր, և հարկ եղած դեպքում կարելի էր ցանկացած անձի ներգրավել այդ «ահաբեկչական» խմբի շրջանակներում և վնասազերծել, այդպես վարվեցին մի քանի հայտնի մարդկանց հետ:
Ինչևէ, արդյո՞ք Հրանտ Եպիսկոպոսյանն իրենից վտանգ է ներկայացնում, թե ոչ: Նա ինձ այդքան հետաքրքիր չէ, որքան այն անձը, ով նրան հասցրեց գեներալի աստիճանի, նա նույնիսկ կապիտան չպետք է լիներ: Նրա «թիկունքը» հասավ նրան, որ այդ անձը դարձավ գեներալ մայոր: Նա գաղտնիքներ կրող անձավորություն է: Կա գործակալական ցանց, կան գործակալներ, ովքեր տարբեր օպերացիաների են մասնակցել: Եթե որևէ երկրում իմանան այդ գործալակի մասին կարող են դրսում վնասել այն ժամանակ այդ ցանցով անցնող գործակալներին: Ի վերջո նա գիտի տարբեր նրբություններ: Մենք գիտենք, թե մեր երկիրն ինչպես է քայքայվել և բզկտվել այս անկուշտների ձեռքին, և այդ նույն անձը կարող է շատ հանգիստ տվյալներ ներկայացնել, և այն քաղաքացիները, որոնք զբաղվել են թալանով, կդառնան այլ երկրի գործակալներ՝ այդ վարկաբեկիչ նյութերի ազդեցության տակ: Նրանցից միլիոններ կառգրավվեն: Այդ պաշտոնում աշխատելուց հետո այդ մարդը կարող է դրսի համար նմանատիպ հարյուրավոր խնդիրներ լուծել, և իմ երկիրը միայն կտուժի դրանից: Նա կասի, թե ով ինչ կղզի ունի, ով Փարիզի կենտրոնում մի շարք սրճարաններ ունի, ով է Լոնդոնում խանութներ գնել. այդ ամեն ինչը դրսում մեզանից կխլեն: Նա լրջագույն ինֆորմացիոն բլոկում է եղել, հազարավոր ինֆորմացիաներ է ստացել, այդ ինֆորմացիաները կօգտագործվեն գումարներ շորթելու համար, իսկ դա մեզ հետաքրքրում է, որովհետև դրանք հայ ժողովրդի գումարներն են և պետք է վերադարձնել ժողովրդին, պետք է լցվի ՀՀ բյուջեն, որպեսզի մենք չմտածենք թե ինչ վարկով զենք գնենք: Այսօր մենք դեֆոլտի շեմին կանգնած երկիր ենք:
-Հրանտ Եպիսկոպոսյանը, ԴԱՀԿ նախկին պետ Միհրան Պողոսյանը, որ մեկ անգամ չէ, որ մամուլի ուշադրության կենտրոնում է հայտնվել բազմաթիվ աղմկահարույց գործերով, ինչպե՞ս է ստացվում, որ այդպիսի մարդիկ միայն աշխատանքից են ազատվում, պատասխանատվության չեն ենթարկվում և կարողանում են ազատ շրջել, ելումուտ ունենալ այլ երկրներ:
-Եթե մենք լուրջ երկիր լինեինք, Հ. Եպիսկոպոսյանը գեներալ – մայորի աստիճանի չէր հասնի: Մենք ապրում ենք մի երկրում, որտեղ օրենքը չի գործում կամ գործում է մի խումբ մարդկանց համար: Մի խումբ մարդիկ կարող են մարդ սպանել և հաջորդ օրը դրսում հայտնվել, բայց թող ընդդիմադիրներից մեկնումեկը օրենքը խախտի և կտեսնեք, թե այդ օրենքը ինչպես է շեշտադրվելու և ինչպես է գործելու: Կարելի է, օրինակ, 135 հոգու վերցնել և հենց այնպես պահել բանտախցերում, հետո դրա համար պատասխան չտալ, և դրանից հետո՝ Մարտի 1-ից հետո այդ մարդիկ շարունակեն պաշտոնավարել տասնյակ տարիներ: Սա Հայաստանի Հանրապետությունն է, այստեղ օրենքի մասին խոսելը տեղին չէ: Եվ այս ամենը որոշում է մեկ մարդ՝ Սերժ Սարգսյանը: Ս. Սարգսյանի կասի՝ գյադե՛ք, էս կողմ անցե՛ք, գյադեքը խռնված կանցեն էս կողմ, կասի՝ գյադե՛ք, էն կողմ անցե՛ք, գյադեքը խռնված էն կողմը կանցնեն: Երկրում գործում է Նազարի և գյադեքի օրենքը:
Հարցազրույցն ամբողջությամբ՝ տեսանյութում:
