Կենտրոնական ընտրական հանձնաժողովը թիվ 38 ընտրատարածքում որոշել է սեպտեմբերի 29-ին ԱԺ մեծամասնական ընտրակարգով լրացուցիչ ընտրություն անցկացնել: Արտահերթ ընտրության անհրաժեշտությունն առաջացել էր այն բանից հետո, երբ Սյունիքի մարզպետի պաշտոնում նշանակվեց Ազգային ժողովի ՀՀԿ խմբակցության պատգամավոր, Քաջարանի պղնձամոլիբդենային կոմբինատի տնօրեն Մաքսիմ Հակոբյանի որդին` Վահե Հակոբյանը, ով տարիներ շարունակ պատգամավոր էր ընտրվել թիվ 38 ընտրատարածքից:
Այս պահին դեռևս հայտնի չէ, թե որ կուսակցությունն ում է առաջադրելու այդ ընտրատարածքում անցկացվելիք ընտրություններին մասնակցելու համար:
«Առաջին լրատվական»-ի հետ զրույցում Գորիսի՝ 1992-94թթ․ քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանը փորձեց կանխատեսել, թե ովքեր կարող են լինել հավանական թեկնածուները:
Նրա կարծիքով՝ իշխանությունը, անշուշտ, կփորձի այդ տեղը պահել և իր շարքերից որևէ մեկին առաջադրելով՝ այդ ընտրատարածքում պատգամավոր դարձնել, թեև այդքան էլ չի կարևորում, թե ում, որովհետև, ըստ Գորիսի նախկին քաղաքապետի, ով էլ լինի, լինելու է իշխանության կամակատարը:
«Ես կարծում եմ, որ Հակոբյանների ընտանիքը թեկնածու կունենա, բայց չեմ կարող ասել, թե Սուրեն Խաչատրյանը կցանկանա՞ առաջ մղել որևէ մեկին, թե՞ ոչ: Ամեն դեպքում թեկնածուն կլինի Հանրապետական կուսակցությունից որևէ մեկը, որևէ սպասարկու, և ամեն ինչ կանեն իրենց նախընթաց ընտրությունների ձևով:
ՀՅԴ-ն հայտարարել է, որ, ըստ էության, իրենք լուրջ չեն վերաբերվում այս ընտրություններին, և դեռևս հայտնի չէ՝ թեկնածու կառաջադրե՞ն, թե՞ ոչ, բայց, կարծես, նրանք ևս գիտեն, որ ընտրության ճանապարհով որևէ բան չի կարող փոխվել:
Ինչ վերաբերում է «Ժառանգությանը», կարծես թե տրամադիր են թեկնածու առաջադրելու: Թող առաջադրեն, յուրաքանչյուրին ցանկանում եմ հաջողություն, բայց կրկնում եմ, որ մեր երկրում, մասնավորապես՝ Սյունիքում, քանի դեռ այս իշխանությունը գործում է, չի կարող լինել ազատ ու արդար ընտրություն»,- ասաց Ս. Հարությունյանը:
Նա հավելեց, որ նույնիսկ գորիսյան դեպքերից հետո իշխանությունը գործի կդնի ընտրակեղծիքների ողջ բազան՝ իր թեկնածուին առաջ տանելու նպատակով: Ինքը այլ կերպ մտածելու որևէ հիմք չունի, քանի որ գործող իշխանությունը միայն տխրահռչակ ընտրությունների արդյունքում կարող է հաղթանակ գրանցել, այլ կերպ հնարավոր չէ:
Սամվել Հարությունյանի համոզմամբ՝ ժողովրդի մեծամասնությունը հույսեր չի կապում գալիք ընտրությունների հետ: «Կարևորում եմ այն, որ ոչ թե ընտրություններով, այլ ժողովուրդը նախևառաջ ուղղակի ժողովրդավարության ճանապարհով, հուժկու պայքարի, ազգային-ազատագրական պայքարի արդյունքում դե ֆակտո իր ձեռքը վերցնի իշխանությունը, որից հետո կարող են տեղի ունենալ ազատ ու արդար ընտրություններ»,- նման տեսակետ հայտնեց Սամվել Հարությունյանը:
