Շուշիի ազատագրման օպերացիայի ղեկավար, Արցախյան պատերազմի հերոս Արկադի Տեր-Թադևոսյանի` Կոմանդոսի կարծիքով, ԼՂ հարցում այսօր սկսվել է դիվանագիտական պատերազմ, որում, ցավոք, հայկական կողմը պարտություններ է կրում:
«Ադրբեջանական կողմը բազմիցս խախտում է հրադադարի ռեժիմը, սակայն դիվանագիտական ասպարեզում սա այնպես է ներկայացնում, թե Հայաստանն է «ագրեսոր», իսկ ԵԱՀԿ Մինսկի խմբի առաքելությունը, գալով տարածաշրջան, երկու կողմերին է կոչ անում դրսևորել հանդուրժողականություն այն դեպքում, երբ Հայաստանը որևէ խախտում չի անում»:
Կոմանդոսը նկատեց, որ դիվանագիտական այս պատերազմում դիվանագետները թաքնվել են խրամատներում և վախենում են իրենց գլուխը այնտեղից հանել:
Նա նաև խոսեց հայաստանյան դիվանագիտության մեկ այլ սխալի մասին, որը վերաբերում է հայ-թուրքական գործընթացին. «Մենք ցանկանում էինք գրկախառնվել մի պետության հետ, որը դարեր շարունակ ծրագիր ունի երկրի երեսից վերացնել հայերին: Մենք նման պետության հետ լեոպոլդ էինք խաղում և կոչ անում ребята давайте жить дружно:
Տեր-Թադևոսյանը նաև նկատեց, որ այստեղ խնդիր կա ռազմահայրենասիրական դաստիարակության առումով: Նրա դիտարկմամբ, կրթության, գիտության և պաշտպանության նախարարությունները պետք է միասին համակարգված աշխատեն, որպեսզի բարձրացնեն երիտասարդների ռազմահայրենասիրական ոգին:
