Այսօր Հայաստանում մեկնարկում է ժայռամագլցման միջազգային փառատոնը, որը կազմակերպվել է Հայաստանի ազգային մրցունակության հիմնադրամի կողմից:
Հիմնադրամի տուրիզմի բաժնի տնօրեն Սյուզաննա Ազոյանը RIA-Novosti գործակալությանն ասել է, որ հիմնադրամը մեծ կարևորություն է տալիս զբոսաշրջության պոտենցիալի վերհանմանը, և նմանատիպ փառատոները Հայաստանը ներկայացնում են լրիվ նոր, ոչ ավանդական լույսի ներքո: «Իսկ այն, որ Հայաստանում ժայռամագլցումը համարվում է շատ հետաքրքիր և յուրօրինակ զբոսաշրջային միջոցառում, է՛լ ավելի է շեշտում այս միջոցառման կարևորությունը», ասել է նա:
Միջոցառման կազմակերպիչ Up the Rocks ակումբի հիմնադիր Մխիթար Մխիթարյանն ասել է, որ այս փառատոնը կնպաստի Հայաստանում ալպինիզմի զարգացմանը: Նրա տեղեկություններով, փառատոնին մասնակցելու են ավելի քան 20 ալպինիստներ Հայաստանից, ԱՄՆ-ից, Լեհաստանից, Գերմանիայից, Շվեյցարիայից, Ուկրաինայից, Ավստրիայից և Իրանից:
