Ադրբեջանական 1news.az կայքի փոխանցմամբ, հունիսի 6-ին Թուրքիայի Քայսերի (նախագահ Աբդուլլահ Գյուլի հայրենի) քաղաքում տեղի է ունենալու Nabucco գազատարի կոնսորցիումի կազմում ներառված ընկերությունների համաձայնագրի կնքման արարողությունը: Այս մասին հայտարարել է Թուրքիայի էներգետիկ ու բնական պաշարների նախարար Թաներ Յըլդըզը:
Վերջինիս խոսքերով, համաձայնագրի կնքմանը մասնակցելու են ավստրիական OMV Gas GmbH, թուրքական BOTAŞ, բուլղարական Bulgargaz, ռումինական Transgaz S.A., հունգարական MOL Natural Gas Transmission Company Ltd և գերմանական RWE AG ընկերությունները:
Յըլդըզը հավելել է. «Nabucco-ի նման խոշոր նախագծերը ժամանակ առ ժամանակ կարող են բարդ ժամանակաշրջան ապրել, սակայն դա չի նշանակում, թե դրանք չեն իրագործվի: Համաձայնագրի ստորագրման առաջիկա արարողությունը մեծ կարևորություն է ներկայացնում նախագծի իրականացման համար:
Հունգարական MOL ընկերության դիրքորոշման պատճառով համաձայնագրի կնքումը բազմիցս հետաձգվել է: Սակայն այժմ ոչ մի խանգարող հանգամանք չի մնացել, ամեն ինչ կարգին է:
Այս տարվա ընթացքում նախագծի հովանավորները կփորձեն ստանալ նախագծի մասնակցության հարցում ադրբեջանական կողմի վերջնական պատասխանը: Եթե Ադրբեջանը բացասական պատասխան տա մեզ, ապա մենք կսկսենք բանակցություններ վարել Իրանի, Իրաքի ու Թուրքմենստանի հետ:
Եվրոպայի ու Թուրքիայի համար այս նախագիծն ունի վիթխարի նշանակություն, և մենք իրավունք չունենք ժամանակ վատնել բանակցությունների վրա: Դրա համար էլ մենք կօգտագործենք Nabucco նախագծի իրականացման բոլոր հնարավորությունները»:
Հիշեցնենք, որ Nabucco գազատարն, ըստ նախագծի, ունենալու է 3300 կիլոմետր երկարություն և տարեկան 31 միլիարդ խորանարդ մետր թողունակություն: Այն պետք է կասպյան ավազանի գազը հասցնի Եվրոպա` շրջանցելով Ռուսաստանի տարածքը:
Nabucco գազատարի նախագծի արժեքը նախկինում նշվող 7.9 միլիարդ եվրոյի փոխարեն, վերջերս աճել է` հասնելով 12-15 միլիարդ եվրոյի: Գազատարի կառուցումը պլանավորված է 2013 թվականին:
