1988թ. վերջին անգամ կիրառվել է մահապատիժ։ Մեր պետությունն ընդունել է մահապատժի վերացման բոլոր միջազգային պայմանագրերը։ Սակայն իրավական առումով դեռ անելու շատ բան կա։
Նախ՝ ՀՀ-ն չի ընդունել Քաղաքացիական և քաղաքական իրավունքների մասին միջազգային դաշնագրի երկրորդ արձանագրությունը։
Փաստաբան Էդմոն Մարուքյանի գնահատմամբ, կարևոր բացթողում է նաև այն, որ Հայաստանը դեռ չի վավերացրել ՄԻԵԿ թիվ 13-րդ արձանագրությունը` բոլոր հանգամանքներում մահապատժի վերացման վերաբերյալ։ Սակայն «Հայաստանում ցմահ դատապարտյալների պահման պայմանների և իրավական կարգավիճակի ուսումնասիրության» վեր հանած իրավական խնդիրներից ամենակարևորը 20 տարուց ավել պատիժ կրած մարդկանց համաներման իրավունքից օգտվելու խնդիրն է։
«Շատ կարևոր է, որպեսզի 20 տարուց ավել անազատության մեջ գտնող առաջին դատապարտյալի՝ Մանուկ Սեմիրջյանի ազատ արձակվելու դիմումը քննվի և ընդունվի հատուկ հանձնաժողովի կողմից»,- ասում է Էդմոն Մարուքյանը։ Մարուքյանը բացասական է գնահատում այն փաստը, որ 2006թ.-ից համաներման դիմումները քննվում են հատուկ հանձնաժողովի կողմից, այսինքն՝ ՔԿՀ անձնակազմի կարծիքը տվյալ դատապարտյալի մասին հաշվի չի առնվում։ «Համաներման հնարավորությունը մի լույս է անծայր մթության մեջ ցմահ դատապարտվածների համար։ Եթե այդ հնարավորությունը միայն ձևական բնույթ է կրում, ապա շատերը նախընտրում են մահապատիժը»,- ասում է փաստաբանը։
Համաներման որոշում կայացնելիս ՔԿՀ-ի անձնակազմի տեսակետը չընդունելը, ըստ Էդմոն Մարուքյանի, կնպաստի բանտարկյալների վարքի վատթարացմանը։
