«Այն, ինչ տեղի ունեցավ Վանաձորում, մեր այսօրվա իրավիճակին համարժեք էր և օրինաչափ»,- անդրադառնալով Վանաձորում տեղի ունեցած ավագանու անդրանիկ նիստի արդյունքներին՝ քաղաքապետի ընտրություններին, «Առաջին լրատվական»- ի հետ զրույցում ասաց Լոռու նախկին մարզպետ Վիգեն Խաչատրյանը՝ հավելելով, որ Վանաձորում սկզբից հասարակության տարբեր հատվածներ, ըստ իրենց պատկերացումների, նպատակների քվեարկել էին, և հետաքրքիր զարգացում էր տեղի ունենում:
«Ողբերգություն չէր, ողջունելի երևույթ էր, որ ՀՀԿ-ն ՀՅԴ-ի հետ չէր կարողացել քվեների մեծամասնությունը ստանալ: Իրականում դա շատ լավ երևույթ էր, մենք աստիճանաբար պետք է համակերպվենք այն առողջ մտածելակերպի հետ, որ իշխանությունը հավերժ չէ, փոփոխվող է, և որ իշխանության փոփոխությունը ինքնանպատակ չէ, օգուտ կբերի ժողովրդին»,- նշեց Վ. Խաչատրյանը:
Նրա կարծիքով՝ Վանաձորում տեղի ունեցածը կարելի է դիտարկել որպես զարգացման խոչընդոտ: «Ողջունելի կլիներ, որ երբ ԼՀԿ-ն, ՀՎԿ-ն, ԲՀԿ-ն հուշագիր ստորագրեցին, այդ ժամանակ ՀՀԿ-ն շնորհավորեր նոր թեկնածուին, որ քաղաքային իշխանությունը անցնում էր նրան, և առաջարկեր միասին զարգացնել սիրելի քաղաքը: Այն, որ ՀՀԿ-ն այդպես չվարվեց, դա չհասկանալու հետևանք է, արհամարհանք է ժողովրդի նկատմամբ, զոռբայություն է»,- նշեց Լոռու նախկին մարզպետը՝ հավելելով, որ Էդմոն Մարուքյանը պետք է վստահ լիներ, թե ում հետ է դաշինք կազմում: Նրա խոսքով՝ հասարակությունը այս ամենից պետք է դասեր քաղի՝ ում վստահի-չվստահի, ում օգտին քվեարկի:
Անդրադառնալով կառավարության փոփոխություններին, Վ. Խաչատրյանը նշեց, որ ուրախ կլինի, եթե իշխանության ներսում տեղի ունեցող փոփոխությունները իրական արդյունքներ ունենան, հակառակ դեպքում կլինի հերթական հիասթափություն, հերթական հետընթաց, հերթական խայտառակություն: «Անընդհատ խոսվում է բարեփոխումների, ընտրական համակարգի նկատմամբ վստահությունը մեծացնելու մասին, սակայն այդ մասին հռչակողները հակառակն են անում, անվստահությունն են մեծացնում: Այն, ինչ կատարվեց Գյումրիում, ընտրական համակարգի նկատմամբ անվստահությունը մեծացրեց: Զոռբայությանը պետք է վերջ տրվի: Մոլուցք է դարձել՝ «իշխանությունը մերն է»:
Կարեն Կարապետյանի նշանակումը, ըստ Վ. Խաչատրյանի, բացահայտեց, որ քաղաքական խոր ճգնաժամ է:
Նրա դիտարկմամբ՝ բարեփոխումներ չեն արվում, որովհետև ՀՀԿ-ի համար իշխանությունը ապրելու ձև է ոչ թե հասարակությանը սպասարկելու ձև: «Երկու ճանապարհ կա՝ կամ օլիգարխների դեմ պայքար պիտի հայտարարենք, վերաբաշխենք ու նոր օլիգարխներ ունենանք, կամ հարմարեցնենք հռչակված համակարգին՝ սեփականատերը չպետք է լինի չինովնիկը, ինչպես որ այսօր է:
Պետք է նախ սկսել վարքուբարքը, մթնոլորտը փոխելուց: Ցանկություն, կամք և նպատակ ունենալու դեպքում Ս. Սարգսյանը կարող է փոխել դրվածքը: Համընդհանուր ախտ է, այդ ախտը վերևից է և արդարացում չունի: Սերժ Սարգսյանն ասում էր՝ ձուկը բռնեք գլխից, ես հրապարակավ ասում եմ՝ այդ գլուխն ինքն է: Ոչ թե պետք է բռնել, այլ ինքը պետք է փոխվի»,- ընդգծեց Վ. Խաչատրյանը:
Մանրամասները՝ տեսանյութում:
