ԱԺ ճեպազրույցների ժամին «Հայ ազգային կոնգրես» խմբակցության ղեկավար Լևոն Զուրաբյանը հարցին, թե «Հայկական վերածնունդը» հայտարարել է, որ Գյումրիում իրենց բոյկոտին են միանում նաև մյուս ուժերը, որոնք չեն հաղթահարել անհրաժեշտ շեմը, արդյո՞ք եղել է այդ հարցում պայմանավորվածություն, ՀԱԿ պատգամավորը պատասխանեց. «Միակ բանն այն է եղել, որ ընտրությունների հաջորդ օրը Հովհաննես Մարգարյանն այցելել է մեր գրասենյակ և խնդրել է, որ մենք աջակցենք ընտրությունների բողոքարկման հարցը: Ասել ենք՝ պրոբլեմ չկա, այդ բողոքարկմանը կմիանանք, այլ բան չի եղել»։
Լևոն Զուրաբյանից լրագրողները հետաքրքրվեցին, թե ըստ նրա՝ Վանաձորում ընդդիմադիր երեք ուժերի համաձայնությունը կվերածվի՞ արդյոք 18 քվեի և Քրիստ Մարուքյանը կդառնա Վանաձորի քաղաքապետ պատասխանեց, որ եթե մեծամասնություն ունեն, կարող են ընտրել քաղաքապետ: Հարցին, թե հաշվի առնելով, որ քվեարկությունը փակ է, հնարավո՞ր է որոշ ավագանիներ կուսակցության որոշումով չշարժվեն՝ պատասխանեց . «Դե լավ, ես չեմ կարծում, որ կուսակցական կարգապահությունն այնքան ցածր մակարդակում է, որ չկարողանան ապահովել այդ քվեարկությունը»:
ՀԱԿ-ը, որպես ընդդիմադիր ուժ, խանդով չի՞ վերաբերում Գյումրիում և Վանաձորում ստեղծված իրավիճակին, քանի որ որպես արմատական ընդդիմություն դուրս է մնացել այդ գործընթացներից. այս հարցին ի պատասխան Զուրաբյանը նշեց. «Սիրավեպերին վերագրվող էպիտետներ չէի կրառի քաղաքականության մեջ: Տվյալ դեպքում մեր մոտեցումները և գնահատականները՝ Վանաձորում և Գյումրիում բավական կեղտոտ, կլանային ընտրական գործընթացի վերաբերյալ արդեն տվել ենք, ցանկություն չունեմ կրկնելու»:
Քանի որ վստահ եք, որ այս նոր կառավարությունը որևէ տեսլական չունի, այդ դեպքում նոր կառավարության, այդ թվում նաև Կարեն Կարապետյանի առաքելությունը ո՞րն է: Այս հարցին ի պատասխան Լևոն Զուրաբյանն ասաց .«Գիտեք, մենք կարող ենք գուշակել, միգուցե առաքելությունն այն է, որ Հանրապետական կուսակցությունը փորձի մեղմել սոցիալական դժգոհությունը և ընդհանրապես լարվածությունը: Բնական է, որ նման քայլերը ժամանակավոր և սահմանափակ արդյունքներ տալիս են, մարդիկ, այնուամենայնիվ, սիրում են գոնե կադրային փոփոխություններ: Կառավարությունից հեռացրել են օլիգարխ համարվող մարդկանց, Սուրեն Խաչատրյանին հեռացրին… այդ քայլերով նրանք փորձում են ռեժիմի մարդկային դեմք ստեղծել: Դա է ընդամնենը ուրվագծվում»:
Մանրամասները՝ տեսանյութում:
