Կառավարության որոշ դիրքորոշումներ կան, որոնք ցույց են տալիս, որ այս կառավարությունը չունի զարգացման տեսլական. այս մասին ԱԺ-ում ճեպազրույցների մասին հայտարարեց ՀԱԿ խմբակցության ղեկավար Լևոն Զուրաբյանը:
«Ճիշտ է դեռ նրանք պետք է ներկայացնեն իրենց ծրագիրը, բայց որոշ հարցադրումների կառավարության ներկայացուցիչների պատասխանները արդեն տարակուսանք են առաջացնում: Մասնավորապես մեր հարցադրմանը, թե երկրի թոշակառուները, որոնք թվով 463 հազար մարդ են, ի՞նչ հեռանկար կարող են սպասել թոշակի բարձրացման հարցում, մենք ոչ միայն պատասխան չենք ստանում, այլև ստանում ենք սոցապ նախարարի և ֆինանսների նախարարի հավաստիացումը, որ թոշակները չեն բարձրացվի։ Մինչդեռ, կառավարությունը պետք է ասի, թե ինչ է պատրաստվում անել։ Սա համարում եմ ծայրաստիճան վտանգավոր… Կարող էր, չէ՞, ասել, որ 3 տարում, 5 տարում կբարձրացնենք թոշակները, չեն ասում»։ Ըստ Լ. Զուրաբյանի սա պատասխանատվությունից խուսափելու հարց է, եթե խոստում չի տալիս, չի ուզում պատասխանատվություն վերցնել։
Ինչպե՞ս կարող է կառավարությունը պրոֆեսիոնալ կառավարիչներ բերել կառավարություն այս աշխատավարձերով. «Ի՞նչ է պատասխանում վարչապետը այս հարցին։ Ասում է՝ չգիտեմ։ Սա ցույց է տալիս, որ կառավարությունը տեսլական չունի։ Որևէ լուծում, հեռանկար չի տալիս այս կառավարությունը։ Սա մտահոգիչ է, մենք գործ ունենք մի կառավարության հետ, որը չի սիրում որևէ պատասխանատվություն ստանձնել»,- նշեց Լ. Զուրաբյանը:
Մանրամասները՝ տեսանյութում:
