Հայաստանը պատրաստակամ է 2016 թվականից հետո էլ պահպանել իր մասնակցության «Վճռական աջակցություն առաքելությանը» ներկայիս մակարդակով: Հոկտեմբերի 5-ին Բրյուսելում տեղի ունեցած «Գործընկերություն հանուն բարգավաճման եւ խաղաղության» խորագրով Աֆղանստանին նվիրված համաժողովի ժամանակ հայտարարել է Հայաստանի ԱԳ փոխնախարար Կարեն Նազարյանը:
Ինչպես այսօր տեղեկացրել են ՀՀ ԱԳՆ-ից, համաժողովը կազմակերպել էր Եվրոպական միությունը՝ Աֆղանստանի կառավարության հետ համատեղ: Համաժողովի նպատակն էր եւս մեկ անգամ վերահաստատել միջազգային հանրության աներկբա աջակցությունն Աֆղանստանին՝ երկրում խաղաղության ու կայունության պահպանման, ինչպես նաեւ տնտեսական զարգացման ու լայնածավալ բարեփոխումների օրակարգն առաջ մղելու գործում:
Ի թիվս ութ տասնյակ երկրների ԱԳ նախարարների, բարձրաստիճան պատվիրակների, ՄԱԿ-ի եւ ՆԱՏՕ-ի Գլխավոր քարտուղարների եւ միջազգային կառույցների ղեկավարների՝ համաժողովին մասնակցում էին նաեւ ԵՄ Խորհրդի նախագահ Դոնալդ Տուսկը, ԵՄ բարձր ներկայացուցիչ Ֆեդերիկա Մոգերինին, Աֆղանստանի նախագահ Աշրաֆ Ղանին ու կառավարության ղեկավար Աբդուլլա Աբդուլլան:
ԱԳ նախարարի տեղակալ Կարեն Նազարյանն իր ելույթում նշել է, որ Հայաստանն իր կարողությունների չափով, գործընկերների հետ միասին, աջակցել է ու շարունակելու է իր ներդրումն ունենալ Աֆղանստանում անվտանգության, խաղաղության ու օրենքի գերակայության հաստատմանը: Այդ իսկ նպատակով էր, որ մեր երկիրը 2010 թվականին միացավ միջազգային կոալիցիային:
Փոխնախարար Նազարյանը համաժողովին վերահաստատել է, որ Հայաստանը պատրաստակամ է 2016 թվականից հետո էլ պահպանել իր մասնակցության «Վճռական աջակցություն առաքելությանը» ներկայիս մակարդակով, ու հավելել, որ Հայաստանը կողմնակից է բուն աֆղանացիների կողմից առաջնորդվող Աֆղանստանի խաղաղության Համապարփակ գործընթացին՝ ուղղված երկրում կայունության, բարիդրացիական հարաբերությունների եւ տարածաշրջանային համագործակցության հաստատմանը:
