Sputnik լրատվական գործակալության փոխանցմամբ՝ Վրաստանի ՆԳՆ-ը քրեական գործ է հարուցել «միտումնավոր սպանության փորձի» հոդվածով՝ կապված ընդդիմադիր «Միասնական ազգային շարժում» (ՄԱՇ) կուսակցության պատգամավոր Գիվի Տարգամաձեի մեքենայի պայթեցման հետ։
Այդ մասին լրագրողների հետ զրույցում հայտարարել է ներքին գործերի փոխնախարար Բեսիկ Ամիրանաշվիլին։ Պատգամավորի մեքենան պայթեցվել էր երեքշաբթի երեկոյան Թբիլիսիի կենտրոնում՝ ՄԱՇ-ի գրասենյակի մոտ։
Պայթյունի պահին ավտոմեքենայում գտնվել են Տարգամաձեն ու նրա վարորդը։ Նրանք երկուսն էլ ստացել են թեթև վնասվածքներ։ Նախնական տվյալներով՝ վիրավորվել են մի քանի անցորդներ։
Ամիրանաշվիլին հայտարարել է, որ դեպքի վայրում աշխատում է քրեագետ-փորձագետների խումբը, տարվում է հետաքննություն. «Մենք ձգտում ենք մոտ ապագայում պարզել ճշմարտությունը։ ՆԳՆ-ը դրա համար կանի ամեն բան»։ Ամիրանաշվիլին զերծ է մնացել եզրակացություններ անելուց, թե որտեղ է տեղադրվել պայթուցիկ սարքը և ինչ տիպի է եղել այն։
Տվյալ հանցանքը պատժվում է 11-14 տարվա ազատազրկմամբ։ Պայթյունը տեղի է ունեցել հոկտեմբերի 8-ի խորհրդարանական ընտրություններից 3 օր առաջ։
