Թունիսի արևմուտքում զոհվել է հակակառավարական ցույցերի մասնակիցներից մեկը` դառնալով անկարգությունների առաջին զոհը, որոնք սկսվել են ընդդիմադիր պատգամավոր Մուհամադ Ալ-Բրահմիի սպանությունից հետո, հաղորդում է Agence France-Presse-ը:
Գործակալության տվյալներով` 45-ամյա Մուհամմեդ Մուֆլին զոհվել է, երբ ոստկանները ցուցարարներին ցրելու համար արցունքաբեր գազ են կիրառել: Տղամարդու մահվան պատճառի մասին չի հաղորդվում:
Հիշեցնենք, որ Թունիսում հայտնի ընդդիմադիր քաղաքական գործիչ Ալ-Բրահմին սպանվել է հինգշաբթի՝ երկրի մայրաքաղաքում: Անհայտ անձինք նրան սպանել են իր տան մոտ: Նա հայտնի է եղել իր ձախ հայացքներով և իսլամիստների խիստ քննադատությամբ:
Ուրբաթ օրվանից Թունիսում հակակառավարական ցույցեր են սկսվել ընդդիմադիր պատգամավորի սպանության կապակցությամբ: