Մի շարք հասարակական կազմակերպությունների ներկայացուցիչներ այսօր լրագրողների հետ քննարկում անցկացրին՝ «Հանրային տրանսպորտի անմատչելիությունը հաշմանդամների համար» թեմայով:
Մարդու իրավունքների պաշտպանի խորհրդական Տաթևիկ Խաչատրյանն իր խոսքում նշեց, որ վերջին օրերին ակտիվորեն քննարկվող տրանսպորտին վերաբերող խնդիրների շարքում անտեսվում է այն փաստը, որ տրանսպորտը բոլորի համար չէ, որ մատչելի է:
«Քաղաքապետը որոշման կասեցման հայտարարության մեջ նշեց, որ խոցելի խմբերին կտրվեն արտոնություններ: Սա բացարձակ ցինիզմ է. ի՞նչ արտոնության մասին է խոսքը, եթե նրանք բացարձակապես չեն կարողանում օգտվել տրանսպորտից»,- ասաց Տաթևիկ Խաչատրյանը:
«Ունիսոն» հասարակական կազմակերպության նախագահ Արմեն Ալավերդյանն իր խոսքում նշեց, որ ոչ միայն սայլակով հաշմանդամներն են, որ չեն կարողանում օգտվել տրանսպորտից: Նա նշեց, որ պետք է չմոռանալ՝ հաշմանդամները տրանսպորտից օգտվում են իրենց ուղեկցողի հետ, և վճարը ստացվում է կրկնակի:
«Բոլոր երթուղիների մրցույթները պետք է պայման ունենան, որ որոշակի տոկոս հարմարեցված լինի հաշմանդամների համար: Դա միանշանակ պետք է լինի օրենքով, ոչ թե մի գործչի բարի կամքի դրսևորում»,- ասաց Արմեն Ալավերդյանը:
Քաղաքապետարանից խոստացել են, որ կլուծեն խնդիրը, և կներկրվի տասը հարմարեցված ավտոբուս: «Ունիսոնի» նախագահի խոսքով՝ տեխնիկական լուծումը ձգձգվում է չինական կողմի պատճատով:
«Հույսի կամուրջ» հասարակական կազմակերպության նախագահ Սուսաննա Թադևոսյանի տվյալներով՝ քսան միլիոն դրամ է հատկացված մատչելի տրանսպորտի համար:
«Երևան քաղաքում տրանսպորտի մատչելիության հարցը շատ է բարձրացվել, իսկ ի՞նչ պետք է լինի միջմարզային հարմարեցված տրանսպորտի խնդիրը. հաշմանդամություն ունեցող մարդկանց մեծ մասը մարզերում են, հանրային տրանսպորտով գալը և Երևանում համապատասխան ծառայություն ստանալը խնդիր է, ստիպված են լինում մեքենա վարձել»,- ասաց Սուսաննա Թադևոսյանը: