«Ազատություն» ռադիոկայանին տված հարցազրույցի ժամանակ քաղաքագետ Ռուբեն Մեհրաբյանն անդրադարձ է կատարել Հայաստանի արտգործնախարարի արտասահմանյան այցերի աճին` դա պայմանավորելով ղարաբաղյան գործոնով.
«Հայաստանի դիվանագիտության ղեկավարի այցելությունների այս խտությունը, կարծում եմ, վկայում է, որ որոշակի գործընթաց է տեղի ունենում, և այդ հետաքրքրության աղբյուրը արևմտյան ընկերակցությունն է:
Նալբանդյանի այցելությունը Մինսկի խմբի համանախագահ երկրներր` Ֆրանսիա, ապա նաև`ԱՄՆ, որն առանցքային դերակատարներից մեկն է մեր տարածաշրջանում, թույլ է տալիս մտածել այն ուղղությամբ, որ Ղարաբաղյան պրոցեսում ինչ-որ փոփոխություններ, այնուամենայնիվ, կարող են և նշմարվել: Համենայն դեպս, դա Միացյալ Նահանգների, այսպես ասենք` ցանկության շրջանակներում է:
Դրա հետ մեկտեղ էլ, հաշվի առնելով, որ Հայաստանում նաեւ ներքաղաքական զարգացումներ են տեղի ունենում, ապա ամերիկյան շահերի տեսակետից, իմ կարծիքով, դրանք պետք է տեղավորվեն ընդհանուր տարածաշրջանային կոնտեքստի մեջ:
Նալբանդյանի այս այցելությունը բավականին անսպասելի էր` այնպես չէր, որ դա ինչ-որ պաշտոնական այցելություն էր` վաղօրոք պլանավորված, այլ դա հրատապ բնույթ է կրում:
Այնպես որ, պետք է սպասենք զարգացումներին և պաշտոնական հայտարարություններին: Մեզ սպասում են հետաքրքիր իրադարձություններ, որոնք դժվար է ասել` կբերե՞ն փոփոխությունների, թե՞` ոչ, բայց ամեն դեպքում` ակտիվացում կլինի»: