Google որոնողական հսկան Հայաստանի անկախության 25-ամյակի առթիվ դուդլ է պատրաստել եռագույնի ֆոնին՝ փոխարինելով իր տարբերանշանի տառերից մեկը Օպերայի և բալետի ազգային ակադեմիական թատրոնի շենքի պատկերով։
Այսօր` սեպտեմբերի 21-ին, Հայաստանը տոնում է Երրորդ Հանրապետության Անկախության օրը:
Հայաստանի Անկախության հռչակագիրն ընդունվել է 1990թ. օգոստոսի 23-ին Հայաստանի Գերագույն խորհրդի նիստում: ՀՀ Գերագույն խորհրդի որոշումով 1991 թ. սեպտեմբերի 21-ին Հայաստանի տարածքում անցկացվել է հանրաքվե: Բնակչությունը պատասխանել է հետևյալ հարցին. «Համաձա՞յն եք, որ Հայաստանի Հանրապետությունը լինի անկախ, ժողովրդավարական հանրապետություն` ԽՍՀՄ կազմից դուրս»: Հայ ժողովուրդը միասնաբար, ավելի, քան 99% ձայների մեծամասնությամբ, «այո» է ասել անկախությանը: Եվ սեպտեմբերի 23-ին ՀՀ Գերագուն խորհուրդը, ամփոփելով հանրաքվեի արդյունքները, Հայաստանի Հանրապետությունը հռչակել է անկախ պետություն:
