Հուլիսի 21-ին YouTube-ում հրապարակվել է շուրջ 3 րոպե տևողությամբ տեսանյութ, որտեղ 11-ամյա Նադալ Ալ-Ահդալը պատմում է, թե ինչու է փախել տանից և գնացել ապրելու քեռու հետ: Տեսանյութն ունի ավելի քան 4 միլիոն 600 հազար դիտում:
Տեսանյութի սկզբում աղջիկը ողջունում է բոլորին, այնուհետև շնորհակալություն հայտնում իրեն օգնած մարդկանց:
«Դա ճիշտ է, որ ես փախել եմ տանից: Ես այլևս չէի կարող ապրել նրանց հետ: Ցանկանում եմ ապրել քեռուս հետ: Ի՞նչ կասեք անմեղ մանկության մասին: Ի՞նչ սխալ բան են արել երեխաները: Ինչո՞ւ եք դուք նրանց այդպես ամուսնացնում»,- ասում է աղջիկը:
Ահդալի խոսքերով՝ իրեն հաջողվել է լուծել իր խնդիրները, սակայն կան շատ անմեղ երեխաներ, որոնք չեն կարողանում անել դա, և շատ հաճախ դիմում են ինքնասպանության:
«Նրանք դեռ երեխաներ են, ի՞նչ գիտեն նրանք: Նրանք ժամանակ չունեն սովորելու կամ ինչ-որ բան անելու: Դա մեր մեղքը չէ: Ես միակը չեմ, դա կարող էր պատահել ցանկացածի հետ»,- ասում է Ահդալը և հավելում, որ նման շատ դեպքեր կան:
Աղջկա խոսքերով՝ ինքը նախընտրում է մահանալ, քան ամուսնանալ այդ տարիքում: Նա նաև նշել է, որ ծնողները սպառնացել են սպանել իրեն, և հարցնում է՝ ո՞ր մի ծնողը նման բան կասեր իր երեխային:
«Ես ուզում եմ շարունակել ուսումս ու իմ կյանքով ապրել: Ես շատ երազանքներ ունեմ: Չեմ ուզում հիմա ամուսնանալ»,- ասում է աղջիկը տեսանյութում:
