Իրանը կշարունակի աջակցել Իրաքի և Սիրիայի ժողովուրդներին և իշխանություններին ահաբեկչության դեմ պայքարում: Այս մասին հայտարարել է Իրանի նախագահ Հասան Ռուհանին Վենեսուելայի Մարգարիտա կղզում տեղի ունեցող Չմիավորման շարժման գագաթնաժողովում՝ փոխանցում է TASS-ը:
Իրանի նախագահի խոսքով՝ միջազգային իրավիճակը լուրջ մտահոգություն է առաջացնում: «Զարգացող երկրների ազգային ինքնիշխանությունը ոտնահարվում է տարբեր պատրվակներով և ձեռք է բերում տարբեր ձևեր: Վերջին տարիներին Սիրիայի, Իրաքի, Եմենի և Լիբիայի ժողովուրդներին բաժին են ընկել դժբախտություն և ողբերգական դեպքեր: Այս ամենում իրենց ոչ կառուցողական դերակատարումն են ունեցել որոշակի պետություններ, որոնք անտարբերություն են ցուցաբերել անմեղ մարդկանց տառապանքների նկատմամբ:
Իրանը առաջին երկիրն էր, որը ահազանգել է Սիրիայում ահաբեկչության տարածման մասին՝ այն ժամանակ, երբ Մերձավոր Արևելքում անպատասխանատու ուժերը զինել և մարզել են ծայրահեղականներին»,- նշել է նա:
«Իսլամական Հանրապետությունը հետագայում էլ կշարունակի աջակցել Իրաքի և Սիրիայի ժողովուրդներին և իշխանություններին համաշխարհային պատմության մեջ ամենավայրենի ահաբեկչական կազմակերպության դեմ պայքարում: Մեր տարածաշրջանում ոչ մի երկիր չի կարող միայնակ հաղթահարել այդ սպառնալիքը»,- ասել է Ռուհանին:
Նա կոչ է արել «չստեղծել անօգուտ և անարդյունավետ կոալիցիաներ, այլ կոլեկտիվ կերպով և անկեղծորեն պայքարել ահաբեկչության և դրա հետևանքների դեմ»:
