Լվովի քաղաքապետ Անդրեյ Սադովոյը շաբաթ երեկոյան 2 անգամ հարձակման է ենթարկվել քաղաքի կենտրոնական հրապարակում: Այս մասին հաղորդում է Ria Novosti-ն՝ վկայակոչելով Լվովի քաղաքային խորհրդի կայքին:
Նշվում է, որ առաջին միջադեպը տեղի է ունեցել մոտ ժամը 18:00-ին, շաբաթ օրը՝ «Ռինոկ» հրապարակում:
«Սպորտային կառուցվածքով անհայտ երիտասարդը նպատակաուղղված հարված է հասցրել նրա դեմքին: Շնորհիվ հաջող արձագանքի՝ հարվածը զգալի վնաս չի պատճառել»,- նշվում է կայքում:
Երկրորդ հարձակումը տեղի է ունեցել նույն հրապարակում՝ 22:30-ին, երբ քաղաքապետը դուրս էր գալիս Ռատուշիից՝ Լվովի քաղաքային վարչակազմի շենքից:
«Անհայտ անձը հարձակվել է Անդրեյ Սադովոյի վրա՝ մեջքից: Այս անգամ իրավապահները ձերբակալել են հարձակվողին»,- նշվում է հաղորդագրության մեջ:
Ըստ Լվովի քաղաքային խորհրդի տեղեկության՝ իրավապահները հետաքննում են գործը: