«Դատախազությունը կորցրել է խորհրդային տարիներին ունեցած իր կարևորությունը»,- «Առաջին լրատվական»- ի հետ զրույցում այս տեսակետը հայտնեց նախկին դատավոր Պարգև Օհանյանը: Անդրադառնալով նախկին գլխավոր դատախազի պաշտոնանկությանը և նոր գլխավոր դատախազի նշանակմանը՝ Պ. Օհանյանը նշեց, որ չի կարծում, թե դատախազի անձով շատ բան է պայմանավորված և նոր նշանակումով շատ բան կփոխվի:
Ոչ հայտնի Արթուր Դավթյանին գլխավոր դատախազի պաշտոնում նշանակումը ուղերձ է հանրությանը, որ դատախազության նշանակությունը չի կարող այնքան կարևոր լինել, որքան կարևոր էր Աղվան Հովսեփյանի ժամանակ, երբ դատախազության ազդեցությունը դատարանների վրա մեծ էր, և այդ ազդեցությունը պայմանավորված էր նաև Ա. Հովսեփյանի՝ քաղաքական իշխանության մեջ ունեցած ազդեցությամբ և դերակատարությամբ: Այս դիտարկման վերաբերյալ Պարգև Օհանյանը նշեց, որ թեև անձը կարևոր է, բայց այլ հանգամանքներով ավելի շատ բան է պայմանավորված, և ընդգծեց, որ համակարգային փոփոխություններ են անհրաժեշտ:
«Նախկին Սահմանադրությամբ դատախազությունը դատական իշխանության «գլխի մեջ» էր, դատախազությունը որպես առանձին համակարգ էր, որը ճիշտ չէր: Նոր Սահմանադրությամբ՝ դատական համակարգի «գլխի տակ» է: Քաղաքակիրթ շատ երկրներում, օրինակ՝ Իտալիայում դատախազությունը արդարադատության համակարգի մեջ է: Արդարադատության նախարարությունն առանց դատախազության արդարադատության նախարարություն չէ, ոչ մի լծակ չունի, բացի մի քանի փոքրիկ կարգապահական կառույցներից: Դատախազությունն ու արդարադատության նախարարությունը պետք է մեկտեղվեն:
Պետք է նախ լուծել դատախազության կարգավիճակի հարցը՝ որ թևի մեջ է դե ֆակտո և դե յուրե, դատախազությունը դե ֆակտո դատական էր, դե յուրե գործադիր էր:
Անընդհատ ուզում են դատախազության անկախությունը շեշտել, բայց դատախազությունը չպետք է լինի անկախ, դատախազությունը պետք է լինի կառավարության կազմում, ենթարկվի արդարադատության նախարարին, վարչապետին: Անկախ պետք է լինի դատարանը: Դատական իշխանության ղեկավար անձով ավելի շատ բան է պայմանավորված, քան դատախազի անձով»,- նշեց նախկին դատավորը:
Պարգև Օհանյանը համոզված է, որ եթե դատական իշխանության ղեկավարը լինի պրոֆեսիոնալ, բարեխիղճ և արդարամիտ, ապա շատ բան կփոխվի երկրում:
«Դատախազությունը, ցավոք, քրեականան գործերով ուղղորդում է դատարանին՝ սկսած նրանից, որ պատժաչափ է միջնորդում (այդպիսի երույթ ոչ մի նորմալ երկրում չկա), և ըստ այդմ՝ ցուցում է տալիս»,- նշեց Պ. Օհանյանը՝ հավելելով, որ դատախազությունը դատարաններին թույլ չի տալիս անկախանալ:
Մանրամասները՝ տեսանյութում:
