Թուրքական Son dakika լրատվական կայքի փոխանցմամբ՝ Ռուսաստանի Գլխավոր շտաբի պետ Վալերի Գերասիմովը հայտարարել է, որ Ռուսաստանի Սևծովյան նավատորմն ունակ է ոչնչացնել պոտենցիալ հակառակորդի ուժերը դեռ կենտրոնացման նավահանգիստներում:
Նրա խոսքով՝ դրա համար Սևծովյան նավատորմն ունի ամեն ինչ, այդ թվում նաև՝ հետախուզական ու խոցման միջոցներ. ««Բաստիոն» տիպի մեկ համալիրն ինչ ասես՝ արժե, նրա հեռահարությունը 350 կիլոմետր է՝ մինչև Բոսֆորը ներառյալ: Դա «Բաստիոն» առափնյա համալիրն է»:
Գերասիմովը հիշեցրել է, որ Սևծովյան նավատորմի տրամադրության տակ կան «Կալիբր» տիպի հրթիռներով զինված սուզանավեր, ծովային ավիացիա, թևավոր հրթիռներով ռազմավարական ավիացիա, ինչն էլ հնարավորություն է տալիս պոտենցիալ հակառակորդի դեսանտը ոչնչացնել՝ թույլ չտալով հասնել Ղրիմի սևծովյան ափ:
Գերասիմովն ընդգծել է, որ եթե նախկինում ասում էին, թե Թուրքիան Սև ծովի գրեթե լիակատար տերն է, ապա ներկայումս իրավիճակն այլ է:
Թուրքական լրատվամիջոցը Գերասիմովի այս հայտարարությունը ներկայացրել է որպես Թուրքիայի համար շոկային:
