Ազատամարտիկների նստացույցն Ազատության հրապարակում շարունակվում է: Այսօր հացադուլ հայտարարած ազատամարտիկներն արդեն երեքն են, վաղը նրանց կմիանա ևս մեկը:
«Ոչ մի դրական պատասխան չի եղել, այլապես սա չէր շարունակվի: Այն ժամանակ տղերքը գնացել էին, շատ քաղաքավարի պահանջները ներկայացրել էին կառավարությանը, ժամկետներ էին տվել։ Բոլորն էլ տեսան՝ այդ ժամկետի ընթացքում ոչ մեկ էլ այստեղ չի հավաքվել: Բայց ժամկետից հետո ոչ մի դրական փոփոխություն չի եղել, դրա համար էլ այս ամեն ինչը շարունակվում է»,- մեկնաբանեց Կարապետ Կարապետյանը:
Ազատամարտիկները միաբերան պնդեցին, որ մինչև վերջ պայքարելու են և նշեցին, որ իրենք անձնական նպատակներ չունեն, իրենցը համընդհանուր գաղափար է, որ վաղը եկող սերունը չխուսափի անհրաժեշտության դեպքում շարք կանգնել:
«Երկրորդ անգամ է՝ կառավարությունը մեզ ոլորապտույտ ճանապարհներով սպասեցնել է տալիս: Մեր զինվորը, մեր ընկերը էսօր դեղի է սպասում: Պետք է մուծվի, վիրահատվի և այլն, և այլն: Կան բժիշկներ՝ հոգով մարդ են, օգնում են, բայց 90 տոկոս վերաբերմունքն այլ ձև է, ինքն իրեն թույլ չի տալիս երեխայի բերանից կտրի իր վերքը բուժի: Ասում են՝ սպասեք, որոշում կայացնենք, դիմենք ԱԺ օրենք ընդունենք: Անցած ամիս ասացին՝ մեկ ամիս ժամանակ տվեք, այս ամսի 17-ին ասացին՝ մեկ ամիս ժամանակ տվեք, «ռըսի զավտրան» է»,- նշեց Ամարասի Տիգրանը:
Ազատամարտիկներն իրենց հիվանդ ընկերոջ համար են անհանգստանում, վախենում են, որ գուցե այս սպասելու ժամանակը նրա ոտքն արժենա: «Էդ տղու ոտը հետ կբերե՞ն: Էդքան ոտքեր թողեցինք կռվի դաշտում, հիմա խաղաղ պայմաններո՞ւմ էլ կորցնենք»,- մտահոգվեց Կարապետ Կարապետյանը:
Ցուցարարները նշեցին, որ իրենք այս երկրի թշնամին չեն, իրենք են կառուցել այս երկիրը, այս երկրի անկախության համար իրենք են արյուն թափել: