ՀՀ վարչապետ Տիգրան Սարգսյանի գլխավորած կառավարական պատվիրակությունն այսօր երկօրյա պաշտոնական այցով ժամանել է Բելառուսի Հանրապետություն։ Մինսկի օդանավակայանում ՀՀ վարչապետին դիմավորել է Բելառուսի Հանրապետության վարչապետ Միխայիլ Մյասնիկովիչը։ Երկրների օրհներգերը հնչելուց հետո վարչապետերը պատվո պահակախմբի ստուգայց են կատարել, ներկայացրել պաշտոնական պատվիրակություններին։ Բելառուսի կառավարության տանը տեղի է ունեցել Տիգրան Սարգսյանի և Միխայիլ Մյասնիկովիչի առանձնազրույցը։
«Մեր բարեկամ երկրի պաշտոնական պատվիրակությունների նման այցերը մեզ համար նշանակալի իրադարձություն են»,-ՀՀ վարչապետ Տիգրան Սարգսյանի հետ հանդիպման ժամանակ ասել է Բելառուսի վարչապետ Միխայիլ Մյասնիկովիչը՝ ներկայացնելով իր ջերմ հիշողություններն անցյալ տարի Հայաստան կատարած իր այցելությունից։ Նա հույս է հայտնել, որ ՀՀ վարչապետի այցը նոր որակական մակարդակի կբարձրացնի երկկողմ հարաբերությունները, այդ թվում՝ տնտեսական, մշակութային, քաղաքական և այլ բնագավառներում։
Ընդգծելով, որ տնտեսական կապերում Հայաստանն ու Բելառուսն ունեն լավ ավանդույթներ, մասնավորապես, վերջին 10 տարվա ընթացքում ապրանքաշրջանառությունն աճել է 16 անգամ, Բելառուսի վարչապետն անդրադարձել է այն ուղղություններին, որոնք հատկապես հետաքրքրական են իրենց երկրի համար, և որոնց ուղղությամբ ակնկալում են փոխգործակցություն։ Նա կարևորել է ժամանակին քննարկված մի շարք երկկողմ գիտատեխնիկական ծրագրերի հետագա իրականացումը։ Նշելով, որ այժմ Հայաստան է ներկրվում բելառուսական դեղագործական արտադրանք՝ Միխայիլ Մյասնիկովիչը հեռանկարային է համարել համատեղ արտադրական հզորությունների ստեղծումը, ինչը հնարավորություն կտա դուրս գալ նաև երրորդ երկրների շուկա։
Բելառուսի վարչապետը հույս է հայտնել, որ այսօր ստորագրվելիք մի շարք փաստաթղթերը կընդլայնեն առկա իրավապայմանագրային դաշտը, ինչը հնարավորություն կտա կողմերին առավել ակտիվ փոխգործակցել նոր ոլորտներում։
Շնորհակալություն հայտնելով ջերմ ընդունելության համար՝ Հայաստանի վարչապետ Տիգրան Սարգսյանը վստահություն է հայտնել, որ այն պայմանավորվածությունները, որոնք նախկինում եղել են, հաջողությամբ կիրականանան։
ՀՀ վարչապետի խոսքով՝ անհրաժեշտ է նման հանդիպումների ընթացքում առավել հանգամանալից ծանոթանալ կողմերի պահանջներին և հնարավորություններին, գտնել համագործակցության եզրեր։ Տիգրան Սարգսյանը, մասնավորապես, անդրադարձել է գյուղատնտեսության ոլորտին, որն այժմ Հայաստանում հայտարարված է որպես առաջնահերթ ուղղություններից։ Հատկապես կարևորվում է գյուղտեխնիկայի բազայի բարելավման և թարմացման խնդիրը, որտեղ Բելառուսի համապատասխան հզորությունները կարող են հետաքրքրություն ներկայացնել։ Նույնը ավտոբուսային պարկի առումով, քանի որ որդեգրվել է երթուղային տաքսիներն ավտոբուսներով փոխարինելու քաղաքականություն։ Այստեղ նաև համապատասխան սպասարկող ծառայությունների խնդիր կարող է առաջանալ։
ՀՀ վարչապետը ներկայացրել է Հյուսիս-հարավ արագընթաց ավտոմայրուղու և այլ նոր ենթակառուցվածքային ուղիների շինարարության ծրագրերը։ Ոլորտը մեծ հեռանկար ունի, և Հայաստանը պատրաստակամ է քննարկելու նաև այս ուղղությամբ Բելառուսի հետ համագործակցության հեռանկարները։
Տիգրան Սարգսյանը համագործակցության լավ հնարավորություններ է արձանագրել նաև դեղագործության ոլորտում, որի համար Հայաստանում կան համապատասխան հզորություններ և հարակից քիմիական արտադրություն։ Այս առումով բելառուսական փորձը ևս կարող է մեծ հետաքրքրություն ներկայացնել։
ՀՀ կառավարության ղեկավարը որպես հեռանկարային ոլորտներ առանձնացրել է նաև սերմնաբուծության, ալմաստի վերամշակման, գիտատեխնիկական բնագավառները, որոնց համար Հայաստանում կան լավ հնարավորություններ, և առկա է երկկողմ հետաքրքրություն։
Տիգրան Սարգսյանի խոսքով՝ քաղաքական երկխոսության այն մակարդակը, որ հաստատված է Հայաստանի և Բելառուսի միջև, երկու երկրների կառավարություններին ստիպում է իրականացնել այն մեծ ներուժը, որն առկա է նաև տնտեսության բնագավառում։
Վարչապետերի հանդիպումից հետո հայ-բելառուսական բանակցությունները շարունակվել են ընդլայնված ձևաչափով։ Նախատեսվում է մի շարք փաստաթղթերի ստորագրում։