Georgia Online-ի փոխանցմամբ՝ Վրաստանի պաշտպանության նախարար Լևան Իզորիան այդ պաշտոնը զբաղեցնելուց գործնականում անմիջապես անց պաշտոնանկ է արել Գլխավոր շտաբի պետի երկու տեղակալներին՝ Նիկոլոզ Ագլաձեին ու Օմար Բեգոիձեին:
Պաշտպանության նախկին նախարար Թինատին Խիդաշելիի տեղեկություններով՝ բարձր պաշտոնները լքել են այն զինվորականները ու քաղաքացիական անձինք, որոնք համակարգել են ՆԱՏՕ-Վրաստան հարաբերությունները:
Խիդաշելիի համար տագնապահարույց ազդանշան է դարձել այն դեպարտամենտի փակումը, որի ստեղծման մասին որոշումը կայացվել էր «Էական փաթեթի» հիման վրա, որը Վրաստանին հատկացվել էր 2014 թվականին ՆԱՏՕ-ի գագաթնաժողովի ժամանակ: Խոսքը Ռազմավարական հաղորդակցությունների դեպարտամենտի մասին է, որի առաջադրանքներից մեկը եղել է ռուսական քարոզչության դեմ աշխատելը: Խիդաշելին ընդգծում է, որ երկրում ռուսական տոտալ քարոզչության ֆոնին դեպարտամենտի փակումը ՆԱՏՕ-ի վարշավյան գագաթնաժողովի որոշման անտեսում է:
Խիդաշելին համարում է, որ վերջին 15 ամսում ՆԱՏՕ-ի ու Վրաստանի միջև ձևավորված լավ հարաբերություններն այսօր ռիսկի տակ են, քանի որ այդ գործընթացի բոլոր համամասնակիցները ազատվել են զբաղեցրած պաշտոններից:
«Ռուսթավի 2» հեռուստաալիքին տված հարցազրույցում Խիդաշելին հայտարարել է. «Այսօր ՊՆ-ում չկա որևէ մարդու պաշտոն, ով ստույգ կիմանա, թե մենք որտեղ ենք կանգնել, ում հետ ինչպիսի բանակցություններ են անցկացվել, ինչ արդյունք է ձեռք բերվել և ինչ պետք է արվեր ապագայում»: