Թուրքական ներխուժումից հետո Սիրիայում տեղի ունեցող վերջին իրադարձությունների, Ղարաբաղյան հիմնախնդրի կարգավորման գործընթացի վրա տարածաշրջանային կոնֆլիկտների հնարավոր ազեդեցության շուրջ «Առաջին լրատվական»- ը զրուցեց ԵՊՀ Քաղաքակրթական և մշակութային հետազոտություների կենտրոնի տնօրեն արևելագետ Դավիթ Հովհաննիսյանի հետ:
Դ. Հովհաննիսյանի կարծիքով՝ Թուրքիայի ներխուժումը բավականին լուրջ ազդեցություն ունի Սիրիայում ընդհանուր իրավիճակի վրա, բայց սիրիական հակամարտության նոր փուլ չի սկսվում. «Սա մարտավարական պայմանավորվածությունների հիման վրա կատարված գործողություն է, նպատակն այն է, որ Թուրքիան թույլ չտա քրդական մեծ տարածք ստեղծվի, որը հիմք կհանդիսանա Քուրդիստանի ձևավորման համար»:
Գերտերությունների ուշադրության կենտրոնացումը Սիրիայի կամ մեկ այլ հակամարտության վրա հնարավո՞ր է, որ առիթ հանդիսանա Ադրբեջանի համար և նորից պատերազմական գործողություններ սկսի. ի պատասխան այս հարցի Դ. Հովհաննիսյանը նշեց, որ ինչպես Պուտինը հայտարարեց Պետերբուրգում, աշխարհում կա մեկ գերտերություն՝ ԱՄՆ: «Միացյալ նահանգները այնտեղ, որտեղ Ռուսաստանի ազդեցությունը մեծ է, թողնում է Ռուսաստանի տնօրինությանը, եթե իր շահերին դեմ չէ»,- նշեց արևելագետը:
Նրա կարծիքով՝ Ղարաբաղում նոր պատերազմ կսկսվի այն դեպքում, եթե այս «ձեռնարկության» բոլոր մասնակիցները համաձայն լինեն դրան. «Ադրբեջանը առանց թույլտվության պատերազմ չի սկսի»:
«Ադրբեջանը մեծացնում էր լարվածությունը, ուզում էր համոզել միջազգային հանրությանը, շահագրգիռ բոլոր կողմերին, որ այլևս այսպես շարունակել հնարավոր չէ: Ադրբեջանը փորձեց ստատուս քվոն խախտել և մեծաթիվ զոհերով հետ շպրտվեց:
Կարծես թե մեծ դաս եղավ մեզ համար, և այդ դասի արդյունքում պիտի որ մեր պաշտպանունակությունը մեծանա:
Ադրբեջանի համար էլ դաս եղավ, հասկացավ, որ բլից-կրիգն անհնարին կլինի: Չեմ կարծում, որ եթե Ադրբեջանը շատ լուրջ ռեսուրսային խնդիրներ չլուծի և շատ լուրջ օժանդակություն չստանա տարբեր կողմերից, կգնա պատերազմի:
Ադրբեջանը կգնա պատերազմի միայն մի դեպքում, եթե մեր ներքին քաղաքականությունը բերի Հայաստանի շարունակվող դատարկմանը»,- ընդգծեց արևելագետը:
Մանրամասները՝ տեսանյութում:
