Bloomberg գործակալությանը տված հարցազրույցում Ռուսաստանի նախագահ Վլադիմիր Պուտինը հայտարարել է, որ միտված է Թուրքիայի հետ հարաբերությունների զարգացմանը, այդ թվում նաև «Թուրքական հոսք» գազատարի և Աքքույուի ատոմակայանի կառուցմանը:
«Մենք առաջին հերթին ելնում ենք նրանից, որ Թուրքիան ներողություն է խնդրել տեղի ունեցած («Սու-24»-ի) միջադեպի, մեր մարդկանց զոհվելու համար, դա արել է ուղիղ՝ առանց որևէ նախապայմանի, և մենք գնահատում ենք դա»,- ասել է նա:
Պուտինի խոսքով՝ Մոսկվան տեսնում է, որ Թուրքիայի նախագահն ակնհայտորեն շահագրգռված է Ռուսաստանի հետ հարաբերություններն ամբողջականորեն վերականգնելու հարցում:
Պուտինն ընդգծել է, որ Ռուսաստանն ու Թուրքիան ունեն համընկնող բազմաթիվ շահեր թե՛ Սևծովյան տարածաշրջանում, թե՛ գլոբալ պլանում, թե՛ Մերձավոր Արևելքի տարածաշրջանում:
ՌԴ նախագահը հավելել է, որ սեպտեմբերի 4-5-ը Չինաստանում կայանալիք G20-ի գագաթնաժողովի շրջանակներում Թուրքիայի նախագահ Ռեջեփ Էրդողանի հետ քննարկելու է երկու երկրների միջև փոխգործակցության հարցը:
