«Ես հակված չեմ այսօր միայն տնտեսական աճի վրա հիմնված գնահատականներին, հնչեցված կարծիքներին արձագանքել: Որպես էկոնոմիկայի նախարար՝ ինձ համար նշանակություն ունի, թե ինչպիսի հիմնարար փոփոխություններ ենք իրականացնում, որպեսզի երկարաժամկետ առումով Հայաստանը ունենա կայուն, երկնիշ տնտեսական աճ: Սա շատ ավելի կարևոր է, քան 1-2 կամ 3 տոկոս տնտեսական աճի վերաբերյալ քննարկումը»: Այս մասին այսօր լրագողների հետ զրույցում ասաց ՀՀ Էկոնոմիկայի նախաար Արծվիկ Մինասյանը:
Հայաստանը մասնակցելու է Բրազիլիայում կայանալիք Տեղեկատվական տեխնոլոգիաների 20-րդ համաշխարհային համաժողովին, ֆինանսական բեռի մի մասը Հայաստանն է իրականացնելու, արդյո՞ք դա շռայլություն չէ ՀՀ-ի համար. ի պատասխան այս հարցի՝ նախարարը նշեց, որ ՏՏ ոլորտը համարվում է Հայաստանի կառավարության կողմից հռչակված գերակայություններից մեկը:
«Սկզբունքային նշանակություն ունի նաև միջազգային կառույցների համար, թե որքանով է մասնավոր-պետություն համգործակցությունն այս ոլորտում աշխատում: Այս դեպքում մենք խոսում ենք ընդամենը համաֆինանսավորման մասին, ոչ ամբողջական ծախսերը վերցնելու մասին, մասնավորապես, գրանցումների և տոմսերի արժեքի մասով, քանի որ 2019 թվականին, երբ ՏՏ համաշխարհային համաժողովն անցկացվելու է Հայաստանում, դրանում անհրաժեշտ է, որպեսզի նաև ներկայացված լինեն այն երկրները, որտեղ որ պետք է անցկացվի այդ համաաժողովը», – նշեց նախարարը՝ հավելելով, որ պայմանն այն է, որ ոչ թե պետական կառույցը ներկայացված լինի, այլ նաև մասնավոր սեկտորը նույնպես:
Մանրամասները՝ տեսանյութում:
