Հայաստանի քաղաքացի, Գլոբալիզացիայի և տարածաշրջանային համագործակցության կենտրոն ՀԿ ղեկավար, քաղաքագետ, նախկինում դիվանագիտական աշխատանքի մեծ փորձ ունեցող Ստեփան Գրիգորյանի մուտքը Ռուսաստանի դաշնություն արգելելվել է մինչև 2030 թվականը:
Կովկասի ինստիտուտի փոխտնօրեն Սերգեյ Մինասյանն «Առաջին լրատվական»- ի հետ զրույցում այս փաստի առնչությամբ նշեց, որ այդ որոշումը վրդովմունք է առաջացնում, սակայն այդ քայլը անսպասելի չէր. «Նման գործողությունները որոշ չափով թրենդ են, ինչը տեսանելի եղավ 2014-ի ուկրաինական ճգնաժամից սկսած՝ հետխորհրդային տարածքում»: Քաղաքագետի դիտարկմամբ՝ այդ գործընթացը շարունակվելու է, և նմանատիպ գործողություններ կիրառվելու են նաև այլոց հանդեպ: Ռուսաստանի ոչ կոռեկտ քաղաքականության արդյունքում նմանատիպ գործողությունները, ըստ Ս. Մինասյանի, հակառակ էֆեկտ են ունենում:
Ս. Մինասյանի կարծիքով՝ Ստեփան Գրիգորյանի նկատմամբ ՌԴ որոշումը կապ չունի Հայաստանում ՌԴ քաղաքացի Ս. Միրոնովի ձերբակալման հետ. «Դա հետխորհրդային քաղաքական վարվելակերպի տարրերից մեկն է, դժվար թե Ռուսաստանի այդ քայլը կապված լինի Միրոնովի ձերբակալության հետ և դժվար թե մեկ գիշերվա մեջ քաղաքական այդպիսի որոշում ընդունվեր և այդպիսի ակցիա իրականացվեր: Ռուսաստանի իշխանություններն ունեն տարբեր խողովակներ՝ իրենց մոտեցումները և դիրքորոշումները Հայաստանի և՛ իշխանություններին, և՛ քաղաքական ուժերին հասցնելու համար»:
Հելսինկյան Քաղաքացիական Ասամբլեայի Վանաձորի գրասենյակի կողմից «Հասարակական հետազոտությունների առաջատար խումբ» հասարակական կազմակերպության ներգրավմամբ իրականացվել է սոցիոլոգիական հետազոտություն, որի արդյունքում պարզվել է, որ ՀՀ քաղաքացիներն ավելի շատ հակվում են դեպի ԵՄ: Մարդիկ կարծես սկսում են զգուշանալ ռուսական բռունցքից: Այս դիտարկմանն անդրադառնալով՝ Ս. Մինասյանը նշեց, որ հակառուսական տրամադրությունների աճի միտում կա Հայաստանի հասարակության շրջանում: «Հայաստանի հասարակության մոտեցումներն այս հարցում մոտենում են քաղաքական էլիտայի տրամադրություններին: Դա ոչ միայն ապրիլյան պատերազմից, Պերմյակովի քայլերից հետո է նկատվում, այլ հատկապես ուկրաինական ճգնաժամից՝ Արևմուտք-Ռուսաստան ջրբաժանի առաջացումից հետո է սկսվել այդ միտումը,- նշեց քաղքագետը,- կանխամտածված կամ չմտածված քաղաքականության արդյունքում եթե Ռուսաստանը ի վիճակի չէ ապահովել Հայաստանի կամ Արցախի անվտանգությունն այնքան, ինչքան որ պետք է, ապա դա խնդիր է ստեղծում և բերում է հասարակական մոտեցումների կորեկցիայի, ինչը կա և՛ Հայաստանում, և՛ ԼՂ-ում»:
Մանրամասները՝ տեսանյութում:
