Մեծ Բրիտանիան կմնա եվրոպական քաղաքականության և դիվանագիտության մասնակից՝ չնայած ԵՄ-ից դուրս գալուն։ Այս մասին հայտարարել է Մեծ Բրիտանիայի արտգործնախարար Բորիս Ջոնսոնը ԵԱՀԿ արտգործնախարարների ոչ պաշտոնական հանդիպման մեկնարկից առաջ։ Այս մասին փոխանցում է TASS գործակալությունը։
«Կարծում եմ՝ այսօր բոլորը կհամաձայնեն, որ եվրոպական մայրցամաքը գտնվում է շատ ավելի լավ վիճակում, քան 30 տարի առաջ,- ասել է նա:- Սակայն ակնհայտորեն կան խնդիրներ։ Մասնավորապես, այսօր մենք կխոսենք Ուկրաինայի մասին»։
Ջոնսոնն ընդգծել է Ուկրաինայի ինքնիշխանությունն ու սահմանները հարգելու անհրաժեշտությունը։ «Պետք է երաշխավորել, որպեսզի ԵԱՀԿ դիտորդները հասանելիություն ունենան այնտեղ, որտեղ նրանց ներկայությունը պահանջվում է»,- ասել է նա։
«Իմ ներկայությունն այստեղ մեր ուղերձի մաս է. ինչպիսին էլ լինեն մեր հարաբերությունները ԵՄ-ի հետ, Մեծ Բրիտանիան չի լքի Եվրոպան։ Մենք եվրոպական երկիր ենք, եվրոպական տերություն և կմնանք ամենաանմիջական կերպով ներգրավված մեր մայրցամաքի դիվանագիտության ու քաղաքականության մեջ»,- նշել է Ջոնսոնը։
