Լիտվան ԵՄ նախագահությունը վերցնում է շատ կարևոր պահի, երբ Արևելյան գործընկերությունը մտնում է որակական նոր փուլ: Այս մասին այսօր հայտարարեց Հայաստանում ԵՄ պատվիրակության ղեկավար Տրայան Հրիստեան՝ «Լիտվայի առաջիկա նախագահության շնորհանդես՝ Վիլնյուսի գագաթնաժողովին ընդառաջ Արևելյան գործընկերության գերակայությունները» թեմայով գիտաժողովի ժամանակ:
Նրա խոսքով՝ Եվրամիությունը շահագրգռված է կայունությամբ ու խաղաղությամբ ոչ միայն ներսում, այլև իր հարևան երկրներում ու տարածաշրջաններում:
Գիտաժողովի կազմակերպիչ՝ Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը ևս կարևորեց Լիտվայի նախագահությունը՝ ընդգծելով, որ Լիտվան, ինչպես Լեհաստանը և Շվեդիան, ԵՄ-ում Արևելյան գործընկերության գործընթացով առավել շահագրգռված և ակտիվ երկրներից է:
Լիտվայի արտաքին գործերի նախարարության՝ Արևելյան գործընկերության հատուկ հանձնարարություններով դեսպան Վայդոտաս Վերբան էլ, խոսելով Լիտվայի ինտեգրման հաջողություններից, շեշտեց, որ երբ Լիտվան նոր էր սկսել բանակցել ԵՄ-ի հետ, չէր էլ կարող ենթադրել տնտեսական համագործակցության այնպիսի բարենպաստ առաջարկների մասին, ինչպիսիք այսօր ԵՄ-ն անում է Հայաստանին:
«Սա անննախադեպ գործընթաց է: Կարևոր է, որ Վիլնյուսի գագաթնաժողովում օրակարգը թելադրելու է ոչ միայն ԵՄ-ն, այլև գործընկեր 6 երկրները: Շատ երկրներ կարող են նախաձեռնել և քննարկել իրենց հուզող բազմաթիվ այլ հարցեր, օրինակ՝ տարածաշրջանային հակամարտությունները: Շատ ուրախ եմ, որ ԵՄ-ն վերջապես ունի ռազմավարություն՝ ուղղված Արևելյան երկրներին»,- ասաց Վ. Վերբան:
