Պաշտպանական կողմը չի բողոքարկելու Հայաստանի Հանրապետության քաղաքացի Հրաչյա Հարությունյանի նկատմամբ կայացրած՝ Մոսկվայի Տվերի դատարանի որոշումը: Հարությունյանը մեղադրվում է ճանապարհատրանսպորտային պատահարի մեջ, որի հետևանքով «Նոր Մոսկվա» տարածքում զոհվել է ավտոբուսի 18 ուղևոր՝ հաղորդում է ITAR-TASS-ը:
«Խափանման միջոցը չափազանց խիստ ենք համարում, սակայն նա արտասահմանյան պետության քաղաքացի է, Ռուսաստանում մշտական բնակության վայր չունի, այդ պատճառով մենք հույս չունենք, թե նրան ազատ կարձակեն»,- ասել է Հարությունյանի փաստաբաններից մեկը դատական նիստի ավարտից հետո:
Փաստաբանները նշել են, որ Հարությունյանի վարած «Կամազի» շահագործումն արգելված է եղել:
«Տվյալ տրանսպորտային միջոցը հավաքված է եղել երեք տարբեր ավտոմեքենաներից, այն արգելված է եղել շահագործել, սակայն դրա սեփականատեր ընկերությունը Հարությունյանին հանձնարարել է հենց այդ ավտոմեքենայով տանել խճաքարը: Իսկ վարորդի պարտականությունների մեջ չի մտել հետևել մեքենայի տեխնիկական վիճակին՝ դրանով պետք է զբաղվեր ընկերության ղեկավարությունը»,- հայտարարել է փաստաբան Չաբանովը և հավելել, որ վթարի պատճառը կարող էր լինել արգելակների խափանումը:
Փաստաբանը նշել է, որ առաջիկա երկու ամիսներին պաշտպանական կողմը մտադիր է զբաղվել տվյալ վարկածն ապացուցելով, ինչպես նաև գտնել այն ընկերությանը, որտեղ աշխատել է Հարությունյանը:
Չաբանովի խոսքով՝ Հարությունյանը չի կարողանում ասել, թե ինչ ընկերությունում է աշխատել, առանց այդ էլ շատ հարցեր են ծագում՝ ում է պատկանել ավտոմեքենան, որը, ինչպես պարզվել է, հաշվառումից հանված է, և ինչ հիմունքով է այն շահագործման ենթարկվել:
Փաստաբանը նշել է՝ կասկածներ կան, որ խոսքը «Ստրոյավտոսերվիս» ընկերության մասին է:
«Մենք արդեն սկսել ենք ստուգել դա, այժմ պարզում ենք ամեն ինչ»,- ասել է Չաբանովը:
