Իսրայելի վարչապետ Բենիամին Նեթանյահուն և Պաղեստինի ազգային վարչակազմի ղեկավար Մահմուդ Աբասը հոկտեմբերին կարող են բանակցություններ անցկացնել Մոսկվայում՝ հայտնում է իսրայելական Ynetnews պորտալը։
Պարբերականի տվյալներով՝ վերջերս կողմերի միջև կապեր են հաստատվել Ռուսաստանում հնարավոր հանդիպման անցկացման առնչությամբ, որը հավանաբար տեղի կունենա հոկտեմբերին։ Ինչպես նշում է պարբերականը՝ դա անսպասելի շրջադարձ կլինի Իսրայելի և Պաղեստինի միջև բանակցային գործընթացում, որտեղ միջնորդի դերով կարող է հանդես գալ Ռուսաստանի նախագահ Վլադիմիր Պուտինը։
«Ներկայում անցկացվում են նախնական քննարկումներ Մոսկվայում՝ Ռուսաստանի նախագահ Վլադիմիր Պուտինի հետ եռակողմ ձևաչափով հանդիպման շուրջ»,- գրում է պարբերականը։
Ավելի վաղ Եգիպտոսի նախագահ Աբդել Ֆաթահ ալ-Սիսին հայտարարել էր, որ Պուտինը վստահեցրել է իրեն Աբասի և Նեթանյահուի միջև ուղիղ բանակցությունների ընդունման Մոսկվայի պատրաստակամության հարցում։
